Shveıtsarııa bıznesi Qazaqstanǵa nege qyzyǵýshylyq tanytyp otyr
ASTANA. KAZINFORM — Tsıýrıhte ótken Qazaqstan-Shveıtsarııa bıznes-forýmynyń qorytyndysy boıynsha jalpy boljamdy somasy 46 mln dollardy quraıtyn yntymaqtastyq týraly memorandýmdarǵa qol qoıyldy. Qujattar saýda, kommertsııalyq jyljymaıtyn múlik jáne óndiristik kooperatsııa salalaryn qamtıdy.
Forým Qazaqstannyń Saýda jáne ıntegratsııa mınıstri Arman Shaqqalıevtiń 20-22 qazanda Shveıtsarııaǵa jasaǵan jumys sapary aıasynda ótti. Іs-sharaǵa qazaqstandyq kásipkerler men taýar óndirýshiler, sondaı-aq Shveıtsarııanyń 90-ǵa jýyq kompanııasynyń ókilderi qatysty.
Mınıstr Qazaqstannyń shıkizattyq emes ónim eksportyn ulǵaıtýǵa basymdyq berip otyrǵanyn atap ótip, shveıtsarııalyq kompanııalardy otandyq taýarlar ımportyn keńeıtýge shaqyrdy.
— Forým aıasynda eki eldiń kásipkerleri B2B formatynda kelissózder júrgizip, qazaqstandyq ónimdi Shveıtsarııa naryǵyna shyǵarý, ınvestıtsııa tartý jáne birlesken jobalardy iske asyrý máselelerin talqylady. Sonymen qatar «QazTrade» AQ men Birikken saýda palatasy saýda-ekonomıkalyq baılanystardy damytý jónindegi memorandýmǵa qol qoıdy, — delingen mınıstrliktiń resmı habarlamasynda.
Qazaqstan men Shveıtsarııa arasyndaǵy taýar aınalymy da ósip keledi. 2026 jylǵy qańtar-tamyz aılarynda eki eldiń saýda kólemi 1,12 mlrd dollarǵa jetip, ótken jyldyń sáıkes kezeńimen salystyrǵanda 19,3%-ǵa artty.
Sapar barysynda taraptar shveıtsarııalyq kompanııalardyń Qazaqstannyń energetıkalyq jáne kommýnaldyq ınfraqurylymyn jańǵyrtýǵa qatysý múmkindikterin de qarastyrdy. Atap aıtqanda, zııatkerlik elektr jelilerin, energııa únemdeıtin jylýmen jabdyqtaý júıelerin, tsıfrlyq esepke alý quraldaryn, sý daıyndaý jáne sarqyndy sýlardy tazartý nysandaryn damytý máseleleri talqylandy.
Kezdesýler qorytyndysynda shveıtsarııalyq kompanııalardyń Qazaqstannyń memlekettik organdarymen jáne ınfraqurylymdyq jobalar operatorlarymen baılanysyn nyǵaıtý jóninde ýaǵdalastyqqa qol jetkizildi.
Buǵan deıin Qazaqstan radıoaktıvti qaldyqtardy basqarýda Shveıtsarııa tájirıbesin qoldanýy múmkin ekenin jazǵanbyz.
