Shveıtsarııa beıtaraptyq qaǵıdatyn qatańdatýdan bas tartty
ASTANA. KAZINFORM — Shveıtsarııa turǵyndarynyń basym bóligi referendýmda eldiń beıtarap qaǵıdatyn qatańyraq bekitýdi kózdeıtin bastamaǵa qarsy daýys berdi, dep habarlaıdy DW.
Aldyn ala málimet boıynsha, «Shveıtsarııanyń beıtaraptyǵyn saqtaý» bastamasyna saılaýshylardyń 71%-y qarsy daýys bergen. Bul derekti gfs.bern qoǵamdyq pikirdi zertteý ınstıtýty keltiredi. Osyndaı nátıjeni Shveıtsarııanyń teleradıo kompanııasy SRF te jarııalady.
Bastama avtorlary Konstıtýtsııada «turaqty qarýly beıtaraptyq» qaǵıdatyn naqtyraq bekitýdi usynǵan. Atap aıtqanda, Shveıtsarııanyń áskerı jáne qorǵanys odaqtaryna qatysýyn shekteý, sondaı-aq qarýly qaqtyǵystarǵa qatysýshy memleketterge qarsy ekonomıkalyq sanktsııalar engizý múmkindigin edáýir taryltý kózdelgen. BUU Qaýipsizdik Keńesi maquldaǵan sharalar, sondaı-aq sanktsııalardy aınalyp ótýdiń aldyn alýǵa baǵyttalǵan áreketter buǵan jatpaıdy dep qarastyrylǵan.
Bastamany Pro Schweiz birlestigi alǵa tartty. Ony qoldaýshylar qatańyraq erejeler eldiń dástúrli beıtaraptyǵyn nyǵaıtyp, Shveıtsarııanyń halyqaralyq qaqtyǵystarǵa tartylý qaýpin azaıtýǵa múmkindik beredi dep sanaǵan.
Federaldyq keńes pen parlament bul usynysqa qarsy boldy. Bastamaǵa qarsylardyń pikirinshe, qoldanystaǵy model syrtqy saıasat pen halyqaralyq yntymaqtastyq máselelerinde bılikke qajetti erkindik beredi.
Shveıtsarııada beıtaraptyq qaǵıdaty Konstıtýtsııada bekitilgen. Alaıda onyń is júzinde qoldanylýy halyqaralyq quqyqpen jáne federaldyq bıliktiń sheshimderimen de retteledi.
Buǵan deıin Islandııa turǵyndarynyń basym bóligi eldiń Eýropalyq odaqqa qosylýy jónindegi kelissózderdi qaıta bastaýǵa qarsy daýys bergeni habarlanǵan bolatyn.
