Shveıtsarııa Alpisinde mıllıarderlerge arnalǵan jerasty qoımalary salynyp jatyr
ASTANA. KAZINFORM – Shveıtsarııa Alpisinde aýqatty klıentterge arnalyp qorǵalǵan jerasty qoımalary salynyp jatyr. Jer betinen 100 metrden astam tereńdikte ornalasatyn oryndarda altyn, aqsha, óner týyndylary men qymbat avtokólikterdi saqtaýǵa bolady, dep habarlaıdy BILD.
Jobany kásipker Tomas Gasserge tıesili shveıtsarııalyq Brünig Mega Safe AG kompanııasy júzege asyryp jatyr.
Qurylys jumystary bıylǵy qańtarda bastalǵan. Kompanııa ókili Hýgo Shıttenhelmniń aıtýynsha, qorǵalǵan aımaqty salýdyń negizgi kezeńi aıaqtalǵan. Alǵashqy qoımalar 2028 jylǵa qaraı daıyn bolady dep josparlanyp otyr.
Bir qoımanyń quny 1 mln eýroǵa deıin jetýi múmkin. Klıent ony 99 jyl boıy paıdalaný quqyǵyna ıe bolady. Alǵashqy kelisimsharttar jasalyp ta qoıǵan eken.
Taýdyń ishinde barlyǵy 20-25 jeke qoıma jabdyqtaý josparlanǵan. Olardy paıdalaný quqyǵy jer kadastrynda tirkeledi. Sondyqtan bul nysandar kádimgi bank uıashyǵynan góri jyljymaıtyn múlikke uqsaıdy.
Joba avtorlary qoımalar urlyqtan, shabýyldardan jáne tabıǵı apattardan qorǵalatynyn aıtady. Іshke kirý kópdeńgeıli qaýipsizdik júıesi arqyly júzege asyrylady.
Tomas Gasserdiń sózinshe, qorǵalǵan aımaqqa jetý úshin kelýshiler birneshe shlıýz ben baqylaý beketinen ótýi kerek.
Eske salaıyq, buǵan deıin Hurun Report jyl saıynǵy reıtıngi sońǵy bir jylda álemde kún saıyn orta eseppen eki jańa mıllıarder paıda bolǵanyn kórsetken.
Sondaı-aq álemdegi eń dáýletti 500 adamnyń baılyǵy bir kúnde júzdegen mlrd dollarǵa óskenin jazdyq.
