Shveıtsarııa AQSh salǵan saýda bajdaryn Trampqa syılyq berý arqyly tómendete aldy

ASTANA. KAZINFORM — Shveıtsarııa bıligi AQSh-ty saýda bajdaryn tómendetýge kóndirý úshin el prezıdenti Donald Trampqa syılyq bergen. Bul týraly Axios portaly derekkózderge silteme jasap habarlady.

«Apple-dy basyp ozý qıyn boldy, biraq shveıtsarııalyqtar muny isteı aldy», dep, portal Amerıka prezıdenti ákimshiligi ókiliniń pikirin keltiredi.

Habarlamada Shveıtsarııa AQSh-qa ónerkásip magnattarynan quralǵan delegatsııa jibergeni, olardyń Trampqa Rolex ústel saǵatyn jáne quny shamamen 130 myń dollar turatyn bir kılogramdyq altyn quımany syıǵa tartqany aıtylady. Axios derekkózderiniń aıtýynsha, Tramp bul syılyqtardy óziniń prezıdenttik kitaphanasy atynan qabyldaǵan, bul olardy zańdy qaıyrymdylyq retinde rásimdeýge múmkindik bergen.

7 tamyzda amerıkalyq tehnologııalyq alyp Apple basshysy Tım Kýk AQSh prezıdenti Donald Trampqa syılyq retinde shyny dısk usynǵan. Onda prezıdenttiń aty, kompanııanyń logotıpi, Apple basshysynyń qoltańbasy jáne sývenırdiń AQSh-ta jasalǵanyn bildiretin jazý qashalyp bederlengen. Kýktyń aıtýynsha, atalǵan dısk 24 karattyq altynnan jasalǵan tuǵyrǵa ornatylǵan.

Buǵan deıin Shveıtsarııa úkimeti AQSh-tyń shveıtsarııalyq ónimderge salynatyn kedendik bajdaryn 39%-dan 15%-ǵa deıin tómendetkenin habarlaǵan edi.

X jelisinde jarııalanǵan jazbada «Shveıtsarııa men AQSh sátti sheshim tapty: AQSh tarıfteri 15%-ǵa deıin tómendetiledi. Konstrýktıvti yntymaqtastyǵy úshin AQSh prezıdentine Trampqa alǵys aıtamyz», delingen.

Eske sala keteıik, bıyl 2 sáýirde Tramp 185 el men aýmaqtan keletin ónimderge kedendik tarıfter engizetinin jarııalaǵan edi. Ámbebap 10% tarıf 5 sáýirden, jeke tarıfter 9 sáýirden bastap kúshine endi.