Shveıtsarııalyq fotograf 500 teńgeliktegi shaǵala beınesiniń avtorlyǵyna talasýda
ALMATY. QazAqparat - Shveıtsarııalyq fotograf Marsel Býrkhard Qazaqstannyń 500 teńgelik jańa banknotyndaǵy shaǵala beınesiniń avtorlyǵyna talasyp jatyr, dep habarlaıdy QazAqparat tilshisi.
Sýretshi Ulttyq bank ótemaqy tólese bas tartpaıtyndyǵyn jetkizdi.
«Men úshin sýretimniń banknotaǵa basylǵany úlken mártebe. Fotoshopta sýretimdi banknotanyń ústine bettestirip kórdim. Kúmánim qalmady. Bul sýretti men Shveıtsarııada Týn kólinde túsirgem. Keıin sýret 2005 jyly Ýıkıpedııaǵa shyqty. Juma kúni bul sýret Qazaqstanda jańa banknotanyń ústine basylatynyn estidim. Keıin reportajdardy oqydym, grafıkalyq dızaıner ınternetten sýret alyp, óziniki retinde paıdalanýy durys emes dep sanaımyn», - dedi Marsel Býrkhard.
Sheteldik sýretshi shý kóterip, daýlasýdan aýlaq ekendigin biraq bul isti jyly jaýyp qoıýǵa bolmaıtyndyǵyn aıtty.
«Men adamdarǵa zııan keltirgim kelmeıdi. Biraq, eger grafıkalyq dızaıner meniń jumysym úshin qalamaqy alǵan bolsa, meni de Ulttyq bank avtor retinde moıyndaýy tıis. Sondaı-aq, ótemaqy alǵanym oryndy bolady», - dedi Marsel Býrkhard.
Aıta ketý kerek, jaqynda QR Ulttyq banki nomınaly 500 teńge bolatyn jańa banknottyń tusaýyn kesken bolatyn.
Aqshanyń bir betinde Qazaq eli monýmenti men kógershinder, al ekinshi betinde Kaspıı teńizi, shaǵalanyń sýreti beınelengen.
Jeli qoldanýshylarynyń biri aqshadaǵy sýrettiń Ýıkıpedııa resýrsyndaǵy sýretke uqsaıtyndyǵyn jazǵan.
Keıinirek shveıtsarııalyq fotograf Marsel Býrkhard bul kýpıýradaǵy shaǵalanyń avtory ózi ekendigin jarııalady.
QR Ulttyq banki sheteldik ónerpazdyń suraǵyna jaýap berdi.
Olardyń aıtýynsha, shaǵalanyń beınesi tabıǵı komponent retinde paıdalanylǵan.
QR Ulttyq banki 500 teńgelik banknotadaǵy shaǵalanyń túr sıpaty, qanattylardyń osy túrine jatatyn barlyq qustarǵa tán sıpat bolǵandyqtan, mundaı sýretter óte kóp ekendigin alǵa tartty.
