Shveıtsarııalyq bankter jarty ǵasyr boıy paıdalanylmaǵan myńdaǵan esepshottar týraly habarlady
ASTANA. QazAqparat - Shveıtsarııalyq bankter 1955 jylǵa deıin ashylǵan, alaıda osy jyldarda paıdalanylmaǵan birneshe myńdaǵan esepshottar bar ekenini moıyndady, dep habarlady RBK.
Alaıda bankırler bul esepshottardyń natsısterge eshqandaı qatysy joq ekenin aıtady.
Reuters agenttiginiń habarlaýynsha, bul aqparatty ashýǵa shveıtsarlyq bankterdi 60 jyldan astam ýaqyt buryn ashylǵan jáne biraq ta sońǵy elý jylda paıdalanylmaǵan esepshottar týraly habarlaý jónindegi jańa zań májbúrledi.
Shveıtsarııa bankteri qaýymdastyǵynyń resmı ókili jýrnalısterge áńgime el azamattarynyń ǵana emes, sheteldikterdiń de esepshottary týraly bolyp otyrǵanyn uqtyrdy. Biraq ol bul arada natsısterdiń salymdarymen eshqandaı baılanys joq ekenin atap kórsetti. Welt am Sonntag basylymynyń málimetteri boıynsha, 1940 jyly Germanııa azamaty ashqan bir esepshot qana kúmán týǵyzdy. Onda 1000 shveıtsarlyq frank saqtalǵan.
Búkilálemdik evreı kongresi shveıtsarlyq bankterdiń paıdalanylmaǵan esepshottar týraly málimetterdi ashýyn talap etip keledi, olar mundaı esepshottarda natsıstik Germanııanyń burynǵy basshylarynyń aqshalary bolýyna úmit etedi, sonyń arqasynda Holokost qurbandaryna ótemaqy tóleý múmkindigi týyndar ma eken dep dámeli.
Shveıtsarııalyq bankter kóptegen ondaǵan jyldar boıy ózderiniń salymshylary týraly aqparatty qupııa saqtaı bilýimen dańqy shyqqan bolatyn, bul salyqtardan kiristerin jasyrǵandardy izdeýmen aınalysatyn uıymdardyń narazylyǵyn týǵyzýda.
