Shveıtsarııaǵa ekologııalyq qaýip tónip tur
ASTANA. QazAqparat - 23 jyl boıy zertteý júrgizgen ǵalymdar osylaı dep dabyl qaqty. Naqtyraq aıtsaq, álem jurty demalatyn Alpi shyńdaryndaǵy qardyń erý jyldamdyǵy qarqyn ala bastaǵan, dep habarlaıdy Habar 24.
Bul 1995 jyldan beri jerseriginen túsirilgen 6,5 myń sýretti zerttegen Jeneva ýnıversıteti ǵalymdarynyń pikiri. Mundaı ǵylymı jumys jergilikti bılikke de tıimdi. Sebebi erigen qar sýynyń qaýpi de anyqtalady. Joba jetekshisi Gregorı Djýlıanıdiń aıtýynsha, ózgeris týrızmmen jan baǵyp otyrǵan el ekonomıkasyna da kesirin tıgizbeı qoımaıdy.
"Vale kantony - shańǵy tebýge qolaıly Shveıtsarııanyń eń tanymal jeri. Alǵashqy onjyldyqta osyndaı ózgeriske tap boldyq. Qara kókpen boıalǵan jerde qalyń qar jatqanyn bildiredi. Endi dál osy jerdi 2015 pen 2017 jyldar aralyǵynda salystyrsaq, qardyń birtindep azaıyp bara jatqanyn baıqaýǵa bolady. Qardyń erýi týrıstik ındýstrııaǵa da teris yqpal etedi. Valede demalý oryndary óte kóp. Ásirese taý týrızmi shyǵynǵa ushyraýy múmkin", - deıdi Zertteý jobasynyń jetekshisi Gregorı Djýlıanı.
2017 jyly Shveıtsarııaǵa aǵylǵan saıahatshylardyń nópiri birneshe ese artty. Federaldy statıstıkalyq basqarmasynyń málimeti boıynsha ótken jyly týrızm salasy el qazynasyna 47 mlrd shveıtsarııa frankisin quıǵan eken.
