Shveıtsarııada náresteniń ata-analary úshin biryńǵaı dekrettik demalys engizilýi múmkin
ASTANA. QazAqparat - Shveıtsarııada balasynyń týýyna baılanysty jas ákelerge 1 kún demalys qana beriletin, keleshekte parlamenttik bastamaǵa baılanysty ol eki aptaǵa deıin uzartylýy múmkin, dep habarlady Rosbalt.
Zań jobasynyń avtory parlament múshesi - Marten Kandınas. Onyń pikirinshe, erler men áıelderdiń bala týý boıynsha demalys quqyǵyn teńestirip, barsha ákelerge náreste ómiriniń birinshi aptasyn qyzyqtaýǵa múmkindik beretin ýaqyt jetti.
Balasy dúnıege kelgen ákege aqysy tólenetin eki apta demalys berý týraly zań jobasy 2014 jylǵy naýryzda usynylǵan bolatyn. Osy aptada zań jobasyn eldiń Ulttyq keńesiniń áleýmettik qorǵaý jáne densaýlyq saqtaý komıssııasy qarady, dep habarlady Euromag. «Bul usynysty bildirgen sebebim, qoǵam damý ústinde. Biz problemalardyń sheshimin tabýymyz qajet. Kóptegen kásiporyndar jas ákelerge bir nemese eki kún ǵana demalys beredi», - dep atap ótti joba avtory Kandınas myrza. Ol qazirgi ekonomıkalyq jaǵdaıda jumys berýshilerden talap etýge bolatyn eń kóp merzim - eki apta ekenine toqtaldy.
