Shveıtsarııada kól túbinen 75 jyl burynǵy ushaq tabyldy
ASTANA. QazAqparat - Shveıtsarııada súńgýirler Fırvaldshtet kóliniń túbinen Ekinshi dúnıejúzilik soǵys keziniń ushaǵyn tapty. Bıplan habar-osharsyz ketti dep sanalyp kelgen.
The Local basylymynń jazýyna qaraǵanda, shveıtsar áýe kúshterine tıesili EKW C-35 barlaýshy ushaǵy 1941 jyly áskerı oqý-jattyǵý kezinde apatqa ushyrap, kólge qulaǵan. Ol 75 jyldan soń Gerzaý kentine jaqyn jerde 200 metr tereńdikten tabyldy.
Bıplandy izdeýge kásibı súńgýir Rodjer Aıhenberger bastaǵan top úsh jylyn sarp etken. Onyń aıtýynsha, ushaq 1941 jyly 20 maýsymda apatqa ushyraǵan. Ekıpajdyń ekeýi de parashıýtpen sekirgen, alaıda onyń bireýi ǵana aman qalǵan.
Eki adamdyq EKW C-35 ushaǵy ótken ǵasyrdyń 30-jyldary Shveıtsarııada jasalǵan. Bıplannyń qanatynyń uzyndyǵy 13 metr, eń joǵary jyldamdyǵy - saǵatyna 335 km.
Ushaqtyń bir bóligi aǵashtan jasalǵandyqtan ony sý betine shyǵarý múmkin emes. Sondyqtan qazir ony sýdan búldirmeı alyp shyǵý jaıy qarastyrylýda.
