Shveıtsarııada Hrapýnov otbasynyń esepshottary jabyldy
ASTANA. 30 qarasha. QazAqparat - Jeneva prokýratýrasy iri kólemde qarajat jymqyrdy degen kúdikpen Hrapýnovtyń otbasyn tekserýdi bastady, dep habarlady shveıtsarııalyq RTS telearnasy.
Regnum aqparat agenttigi habarlaǵandaı, tekserýdi bastaý sheshimi aǵymdaǵy jyldyń kókteminde qazaqstandyq bılik tarapynan Shveıtsarııaǵa quqyqtyq kómek kórsetý jónindegi suranysyna baılanysty qabyldandy.
Telearnanyń bergen aqparattaryna qaraǵanda, qazirgi ýaqytta Hrapýnov otbasynyń Credit Suisse jáne Schroder & Co Bank AG bankterindegi esepshottary jabyldy, sondaı-aq barlyq qujattar tárkilendi.Prokýratýra Almatynyń burynǵy ákimine 300 mln. shveıtsarııalyq frank kóleminde qarajattyń (322,6 mln. dollar) qaıdan kelgenin anyqtaıdy.
Esterińizge sala keteıik, Hrapýnovqa qatysty Qazaqstanda 20 qylmystyq is qozǵaldy. Qazaqstandyq tergeý organdarynyń málimetinshe, 2003 jyldan bastap 2007 jylǵa deıin Hrapýnovtyń otbasy Shveıtsarııadaǵy sheteldik esepshottarǵa jáne ofshorly aımaqtarǵa 48 mln.-nan astam dollar jáne 7 mln. eýro somasynda qarajat aýdarǵan. Aǵymdaǵy jyldyń qazan aıynda Vıktor Hrapýnovtyń jubaıy Láılá iri kólemde qarjy jymqyrý, alaıaqtyq faktileri boıynsha izdeýge jarııalanǵan bolatyn.
