Shveıtsarııada erigen muzdyqtan 75 jyl buryn joǵalǵan erli-zaıyptynyń múrdesi tabyldy
ASTANA. QazAqparat - Shveıtsarııada Alpi taýynda Ekinshi dúnıejúzilik soǵys kezinde joǵalyp ketken erli-zaıyptynyń múrdeleri tabyldy. Jeti balasy bar Marselın men Fransın Dıýmýlın 1942 jyly 12 tamyzda eldiń ońtústik batysyndaǵy Vale kantonynyń Shandolın aýylynan taýǵa ketip oralmaǵan, dep jazady Le Matin gazeti.
Jergilikti polıtsııanyń málimetinshe, erli-zaıyptynyń qujattary arqyly anyqtaǵan, olardyń múrdesin ótken aptada jumysshylar tapqan.
Dıýmýlınder Le-Dıabler taý-shańǵy kýrortynyń taýǵa kóteriletin qurlyǵysy janynan Tsanfleron muzdyǵynda 2 615 metr bıiktikten tabylǵan. «Deneler qatar jatty. Bul Ekinshi dúnıejúzilik soǵys kezindegi kıimderi bar er adam men áıel edi», - dedi muzdyq tusyndaǵy taýǵa kóteriletin apparat tıesili kompanııa basshysy Bernard Tshennen.
Onyń aıtýynsha, jubaılardyń máıiti muzdyq ishinde jaqsy saqtalǵan. «Bizdiń oıymyzsha, olar muzdyq jaryǵyna túsip ketken, sonda 70 jyl jatqan. Muzdyq erigende máıitterdi jumysshylar baıqap qalǵan».
40 jastaǵy Marselın Dıýmýlın etikshi, 37 jastaǵy Fransın muǵalıma bolǵan. Olardyń bes ul eki qyzy bolǵan. Balalar erli-zaıypty joǵalyp ketken soń birneshe otbasyǵa berilgen. Qazir kózi tiri kenje qyz ata-anasyn dástúr boıynsha jer qoınyna tapsyrmaq.
