Shveıtsarııada Almaty men Beıjiń qalalarynyń 2022 jylǵy Olımpıadany ótkizýge ótinimderi tanystyryldy
BRıÝSSELЬ. QazAqparat - Seısenbi kúni shveıtsarııalyq Lozanna qalasynda Halyqaralyq Olımpıada komıtetiniń shtab-páterinde 24-shi qysqy Olımpıada oıyndaryn ótkizýge berilgen ótinimder tanystyryldy, dep habarlady sheteldik BAQ.
HOK komıssııasynyń nazaryna Almaty jáne Beıjiń qalalarynyń dúbirli dodany ótkizý jospary usynyldy. Osyǵan deıin básekeden Krakov, Lvov, Mıýnhen, Oslo, Stokgolm, sonymen birge birlesip ótinish bildirgen Davos pen Sankt-Morıts qalalary túsip qaldy.
«Búgin 2022 jylǵy qysqy Olımpıada oıyndary úshin mańyzdy kún. Óıtkeni eki úmitker qalanyń kózqarasymen tanysa alamyz», - dedi HOK prezıdenti Tomas Bah. Oıyndardy uıymdastyratyn qala HOK bóletin 880 mln dollar qarajatty esepke ala alady. Bul HOK-ine marketıng pen osy aıtýly oqıǵany jurtshylyqqa taratýdan túsetin paıda. Sonymen qatar jeńimpaz qalaǵa Olımpıada oıyndaryn ótkizýde ózge de artyqshylyqtar beriletin bolady. HOK baǵalaý komıssııasy Reseı ókili Aleksandr Jýkovtyń basshylyǵymen 14-18 aqpanda Almatyǵa barady, odan keıin 2022 jylǵy Olımpıadany ótkizýge úmitker Beıjiń qalasyna at basyn burmaq (24-28 naýryzda). Komıssııa nysandar ázirliginiń nátıjesi boıynsha baıandama daıarlap, 9-10 maýsymda Lozannada ony HOK múshelerine usynady. Jeńimpaz qalany Halyqaralyq Olımpıada komıtetiniń atqarýshy komıteti 2015 jyly 31 shildede Kýala-Lýmpýrdaǵy uıym sessııasynda anyqtaıdy.
