Shveıtsarııada «Abaı oqýlary» ótti

ALЬPІ. QazAqparat - Qazaq halqynyń uly aqyny jáne oıshyly Abaıdyń 175 jyldyq mereıtoıyna oraı Qazaqstannyń Shveıtsarııadaǵy Elshiligi Tsıýrıh ýnıversıtetiniń akademııalyq orta ókilderi, Abaı shyǵarmashylyǵyn súıip oqıtyn shveıtsarııalyqtar, sol elde oqıtyn qazaqstandyq stýdentter, qazaq dıasporasy men elshilik dostarynyń qatysýymen «Abaı oqýlary» atty open-air is-sharasyn uıymdastyrdy. Bul jóninde Syrtqy ister mınıstrligine silteme jasap QazAqparat habarlaıdy.

Іs-shara Lıýtsern mańynda Alp jáne ataqty Lıýtsern kólimen qorshalǵan eski Meggan saraıy janynda ótti.

Koronavırýs pandemııasyna baılanysty mundaı format óte qolaıly jáne oryndy boldy, óıtkeni Abaı óleńderi akademııalyq qabyrǵalarǵa qaraǵanda tabıǵat aıasynda erekshe oqylady.

Sharada Qazaqstan Elshisi Álibek Baqaev:

«orystar úshin Tolstoı, aǵylshyndar úshin Shekspır, nemister úshin Gete qalaı baǵalansa, qazaq halqy úshin Abaı da sondaı qurmetke ıe. Eger álem Abaı týraly jáne onyń qazaq mádenıeti men ádebıetine qosqan úlesi týraly bilse, onda biz qazaq ádebıeti álemdik klassıkalyq ádebıette óziniń mańyzdy ornyn aldy dep aıta alamyz» dep atap ótti.

Tsıýrıh ýnıversıtetiniń Antropologııa jáne áleýmettik ǵylymdar kafedrasynyń jetekshisi, qazaq tilin meńgergen professor Peter Fınke Abaı shyǵarmashylyǵy qazaq ádebıeti men tarıhy úshin asa qundy ekenin atap ótti.

Uly aqynnyń shyǵarmashylyǵymen tanys is-shara qonaqtary Abaı shyǵarmalaryn qazaq, frantsýz jáne nemis tilderinde oqydy.

Uly qazaq aqynyn eske alýǵa arnalǵan «Abaı oqýlary» óte jyly jáne dostyq atmosferada ótip, qazaq ádebıetin nasıhattap, barlyq qatysýshylarǵa jaǵymdy estelikter qaldyrdy.