Shveıtsarııa taýlarynda 37 jyl buryn joǵalyp ketken alpınıstiń súıegi tabyldy
ASTANA. QazAqparat – 1986 jyly Tsermatt taýlarynda joǵalyp ketken 38 jastaǵy nemis alpınısiniń qaldyqtary tabyldy, dep habarlaıdy QazAqparat «Azertadj» agenttigine silteme jasap.
Agenttiktiń shveıtsarııalyq BAQ-qa silteme jasap habarlaýynsha, 1986 jyldyń qyrkúıeginde tanymal Shveıtsarııa kýrorty – Tsermatta 38 jastaǵy Germanııa alpınısi iz-túzsiz joǵalyp ketken. Sol kezde izdeý jumystarynan eshqandaı nátıje shyqpady. 37 jyl ótkennen keıin alpınıster Teodýl muzdyǵynan adam súıekterin kezdeısoq tapty. DNQ arqyly bul kezinde joǵalyp ketken nemis alpınısi ekeni dáleldendi.
Vale kantony polıtsııasynyń habarlaýynsha, 1986 jyly ol Tsermatt aımaǵynda taýǵa shyǵyp, lagerge qaıta oralmaǵan. Uzaq ýaqyt boıy iz-túzsiz joǵalǵandar qatarynda boldy. Endi mine, qural-saımandarymen (taýǵa shyǵýǵa arnalǵan báteńke men taıaǵy) birge tabyldy. Onyń súıegi Sıon qalasyndaǵy Vale kantonynyń kantondyq emhanasy janyndaǵy Sot medıtsına ınstıtýtynda zertteldi.
«DNQ nátıjesi bul 1986 jyldyń qyrkúıeginen beri iz-túzsiz joǵalǵandar qatarynda bolǵan alpınıst ekenin kórsetti», - delingen kantondyq polıtsııanyń baspasóz habarynda.
Jahandyq jylynýǵa baılanysty Alpi taýlaryndaǵy muzdyqtar erip jatyr. Sonyń nátıjesinde alpınıster men baqtashylar ondaǵan jyl buryn joǵalyp ketken adam súıekteri men eski zattardy jıi taýyp júr.
