Shveıtsarııa Prezıdenti Qazaqstannyń negizgi basymdyǵyn atady
NUR-SULTAN. QazAqparat - Búgin Aqordada Qazaqstan Prezıdenti Qasym-Jomart Toqaevpen kelissózderden keıingi birlesken málimdeme barysynda Shveıtsarııa Konfederatsııasynyń Prezıdenti Ýlı Maýrer elimizdiń negizgi basymdyǵyn atady, dep habarlaıdy QazAqparat tilshisi.
«Biz úsh komponentke negizdelgen eki jaqty qarym-qatynastarymyzdy damytýǵa umtylamyz. Degenmen, taýar alys-berisin ǵana damytqymyz kelip otyrǵan joq. Bilim almasý salasyndaǵy da ózara is-qımyldy jandandyrǵymyz keledi. Biz úshin birlesken kásiporyndar qurý, bilim, jańa tehnologııalar almasý barynsha mańyzdy», - dedi Ýlı Maýrer.
Sonymen qatar ol Shveıtsarııaǵa qaraǵanda Qazaqstannyń qandaı basymdyǵy bar ekendigin aıtty.
«Qazaqstan jas ári qarqyndy damýshy memleket. Bul elderińizdiń eń úlken basymdyǵy jáne Shveıtsarııadan da úlken aıyrmashylyqtaryńyz sanalady. Sebebi bizde halyqtyń qartaıý protsesi júrip jatyr», - dedi Shveıtsarııa Prezıdenti.
