Shveıtsarııa quramasynyń kapıtany Qazaqstanmen match týraly: Bul oıynda favorıt emespiz
ASTANA. QazAqparat - Tennısten Shveıtsarııa quramasynyń kapıtany Severan Lıýtı 2-4 aqpan kúnderi Astanada ótetin Qazaqstan-Shveıtsarııa arasyndaǵy Devıs kýbogynyń 1/8 fınaly jóninde pikir bildirdi, dep habarlaıdy QazAqparat tilshisi.
Qurama kapıtany tanymal shveıtsarııalyq tennısshiler - Rodjer Federer men Sten Vavrınkanyń quramada bolmaýynyń komanda oıynyna aıtarlyqtaı áser etetinin jasyrmady.
«Joǵary bilikti oıynshylardyń bolmaýy komanda men ondaǵy kóńil-kúıge áser etedi. Rodjerdiń kelmeıtinin basynda bilgenbiz, sondyqtan bárine daıynbyz. Bizdiń oıynshylarymyz jas, qashan da oınaýǵa ázir. Olarǵa úlken senim artamyz jáne jeńý úshin barymyzdy salamyz», - dep jaýap berdi S. Lıýtı Ulttyq tennıs ortalyǵynda ótken baspasóz máslıhatynda jýrnalıster saýalyna.
Qarsylas komanda kapıtany Qazaqstannyń tennısshilerdiń osal emestigin moıyndady.
«Buǵan deıin de Kýkýshkınmen bir alańda oınap kórgenbiz. Qazaqstannyń tennısshileri Devıs kýbogynda óte jaqsy nátıjeler kórsetip keledi. Sondyqtan óte tartysty oıyn bolǵaly tur. Bizdiń komanda áli jas. Olar Qazaqstanǵa eki kún buryn ushyp keldi jáne kóńil-kúıleri bir qalypty. Árıne, bul oıynda favorıt emespiz. Dese de, kórermenniń kóńilinen shyǵý úshin barymyzdy salamyz», - dep óz sózin túıindedi Severan Lıýtı.
Aıta keteıik, 2-4 aqpan kúnderi Astanadaǵy Ulttyq tennıs ortalyǵynda álemdik Devıs kýbogynyń 1/8 fınaly ótedi. Jarys 2 aqpan kúni saǵat Astana ýaqytymen 12:00-de, 3 jáne 4 aqpan kúnderi 14:00-de bastalady.
Qazaqstan atynan Mıhaıl Kýkýshkın (ATP reıtınginde 69-oryn), Aleksandr Nedovesov (234) Dmıtrıı Popko (248), Tımýr Habıbýlın (783) jáne debıýtant Roman Hasanov (711) baq synaıdy. Olarǵa Shveıtsarııa quramasy atynan Genrı Laaksonen, Adrıan Bodmer, Mark Andrea Hýsler, Antýan Beler jáne Lýka Margarolı qarsylas bolmaq.
Eske sala ketsek, Qazaqstan Devıs kýbogyna 1995 jyldan beri qatysyp keledi. Ulttyq quramamyz 2010 jyly birinshi ret Álemdik topqa ilikken bolatyn. Al 2011, 2013, 2014 jáne 2015 jyldary jarystyń shırek fınalyna shyqty.
