Shveıtsarııa halqy áıelderdiń zeınet jasyn 65-ke deıin kóterý bastamasyn qoldady

ASTANA. QazAqparat – Shveıtsarııa halqy referendýmda zeınetaqy reformasyn qoldady. Resmı derekterge sáıkes, 25 qyrkúıekte ótken jalpyhalyqtyq daýys berý kezinde saılaýshylardyń 50,6 paıyzy áıelderdiń zeınet jasyn 64 jastan 65 jasqa kóterýdi jaqtap daýys bergen. Osylaısha, qazir ol eldegi er adamdar úshin belgilengen zeınetkerlik jasqa sáıkes kelip otyr, dep habarlaıdy QazAqparat Deutsche Welle-ge silteme jasap.

Zeınet jasyn ulǵaıtý máselesi - Shveıtsarııada júrgizilip jatqan reformanyń eń daýly bóligi boldy.

Sondaı-aq saılaýshylar zeınetaqy qoryna túsetin túsimdi ulǵaıtý jáne osylaısha tapshylyqty jabý úshin qosylǵan qun salyǵyn kóbeıtý kerek pe degen máseleni bólek daýys berý arqyly sheshti. Bul sharany aqyry 55% adam qoldaǵan.

Reforma qartaıǵan halyqtyń zeınetaqysyn qorǵaýǵa baǵyttalǵan. Ony júzege asyrý úshin eki zań jobasyn da qabyldaý qajet boldy. Saılaýshylardyń referendýmǵa qatysýy 52 paıyzdy qurady.

AFP agenttiginiń habarlaýynsha, Shveıtsarııada zeınetaqy reformasy sońǵy ret 25 jyldan astam ýaqyt buryn júrgizilgen. Zańnamaǵa ózgertýler 2004 jáne 2017 jyldary engizilmek bolǵan, alaıda daýys berý nátıjesinde bul áreketter sátsiz aıaqtaldy.

El úkimeti eń mańyzdy reforma sharalaryn ótken jyly usynǵan bolatyn. Ony qoldaýshylar eldegi ekonomıkalyq jáne demografııalyq jaǵdaıdy eskere otyryp, áıelderdiń uzaǵyraq jumys isteýin talap etý durys degen pikir bildirdi.

Bul rette solshyl partııalar men kásipodaqtar usynylǵan ózgeristerdi synap, referendým ótkizýdi talap etti.

Qarsy shyqqandar óz ustanymyn Shveıtsarııada áıelder men erler arasynda jalaqynyń aıtarlyqtaı aıyrmashylyǵy bar, áıelder erlerge qaraǵanda áldeqaıda tómen zeınetaqy alatynymen túsindirdi.

Synshylardyń pikirinshe, zeınet jasyn osy másele sheshilgennen keıin ǵana kóterý kerek.

Jeksenbi kúni Shveıtsarııada janýarlardy qorǵaý uıymdary usynǵan ónerkásiptik mal sharýashylyǵyna tyıym salý týraly bastama da daýysqa salyndy.

Referendým qorytyndysy boıynsha bul bastama qabyldanǵan joq, sebebi azamattardyń 63 paıyzy buǵan qarsy shyqty.

Foto: dw.com