Shveıtsarııa EO-ǵa kirý týraly ótinimdi qaıtaryp alǵany jóninde Brıýsseldi habardar etti
ASTANA. QazAqparat - Shveıtsarııa óziniń Eýropalyq odaqqa ený týraly 1992 jyly bergen ótinimin qaıtaryp alǵanyn Brıýsselge resmı túrde eskertti. Bul jóninde syrtqy ister federaldyq departament basshysy Býrkhalter Dıde habarlap, buryndary ótinimdi qaıtaryp alýǵa parlamenttiń daýys berýine baılanysty bul qadamnyń eskertilgenin aıtty, dep jazady TASS.
«Bizde eń jaqyn seriktesimiz Eýroodaqpen negiz qalaýshy jáne ekitarapty kelisimder bar, biraq ol odaqqa kirgimiz kelmeıdi», - dep málimdedi Býrkhalter Shveıtsarııalyq Konfederatsııa qurylýynyń 725 jyldyǵyna oraı uıymdastyrylǵan Vallorb qalasyndaǵy saltanatty jınalys barysynda. - Federaldyq keńes te osy tańdaýǵa toqtady. Eýropa ekonomıkalyq keńistigi jaıly másele boıynsha daýys berý nátıjesinde 1992 jyly berilgen odaqqa ený týraly ótinimniń kúshin joǵaltqanyn rastaý úshin birneshe kún buryn jazbasha túrde Eýropalyq odaqty habardar etti. Sonymen birge, shveıtsarııalyq dıplomatııa basshysy atap ótkendeı, el úkimeti óziniń EO-men ekijaqty kelisim jolyn jalǵastyrýǵa jáne damytýǵa yntaly ekenin eske saldy.
15 maýsym kúni shveıtsarııalyq parlamenttiń «kishi palatasy» - kantondar keńesi «úlken palata» - ulttyq keńestiń naýryz aıynda qabyldaǵan sheshimimen kelisip, ótinimdi qaıtyp alýdy qoldaıtyndaryn jetkizdi.
Odaqqa ený týraly ótinim 1992 jyldyń mamyr aıynda berilgen. Alaıda, sol jyldyń jeltoqsan aıynda ótken taǵdyrsheshti referendýmda Shveıtsarııa halqynyń 50,3%-ynyń daýysymen Eýropa ekonomıkalyq keńistigine qosylýǵa qarsy shyǵýynan keıin, is júzinde ózektiligin joǵaltqan.
Shırek ǵasyr boıy esh ózgerissiz jatqan sol ótinimdi qaıtarý-qaıtarmaý máselesi Shveıtsarııada pikirtalas týǵyzdy. EO-ǵa jaqyndaýdan Konfederatsııa sývernıtetine qaýip tónedi dep sanaıtyn quqyqtyq-konservatorlyq Shveıtsarııa halyq partııasynyń ókilderi ótinimdi resmı qaıtaryp alýdy talap etti.
Shveıtsarııa búkil Eýropaǵa joǵary aýqattylyqtyń Eýropalyq odaqqa músheligimen baılanyssyz ekenin kórneki túrde kórsetýde. Statıstıka federaldyq basqarmasynyń málimetteri boıynsha, Germanııamen, Frantsııamen salystyrǵanda, Shveıtsarııa halqynyń ortasha tabys deńgeıi 1,3 ese joǵary, Italııa halqynan 1,7 ese kóbirek. Mamyr aıynyń sońynda jarııalanǵan «Qaýipsizdik - 2016» jyl saıynǵy áleýmettik zertteý qorytyndysyna sáıkes, Shveıtsarııa azamattary óz eliniń táýelsiz ekonomıkalyq baǵytyn joǵary baǵalaıdy. 2015 jylmen salystyrǵanda EO-ǵa kirýdi jaqtaýshylar sany 21 paıyzdan 16 paıyzǵa deıin tómendegen.
