Shveıtsarııa da páranja kııýge tyıym salýy múmkin
ASTANA. Mamyrdyń 6-sy. QazAqparat - Shveıtsarııada páranja kııýge tyıym salý týraly usynys jasaldy. Shveıtsarlyq Araý antonynyń depýtattary osyndaı usynys engizip otyr.
Jergilikti basylymdarǵa silteme jasap Associated Press agenttiginiń habarlaýynsha, depýtattar usynysty Shveıtsarııanyń Memlekettik keńesiniń qaraýyna usynýǵa daýys bergen: 89 adam - qoldap daýys berse, 33 adam - qarsy daýys bergen.
Esterińizge sala keteıik, sáýirdiń 21-inde Frantsııa Prezıdenti Nıkolıa Sarkozı el úkimetine qoǵamdyq oryndarda páranja men nıkab kııýge tyıym salatyn zań jobasyn ázirleýdi tapsyrǵan bolatyn. Frantsýz Respýblıkasynyń basshysy, bet-basty tumshalaıtyn kez-kelgen dástúrli kıimge tyıym salý kerek ekenin, sebebi ondaı kıimder qyz-kelinshekterdi qorlaıtynyn málim etti. Úkimetke qysqa merzimniń ishinde zań jobasyn ázirlep, mamyr aıynda ony parlamenttiń qaraýyna usyný mindetteldi.
Degenmen, birqatar frantsýz sarapshylary, dástúrli musylman kıimderine tyıym salý Frantsııa Konstıtýtsııasyna qaıshy ekenin aıtýda. Oǵan qosa, bul bastama elde turyp jatqan 5 mıllıon musylmannyń narazylyǵyn týǵyzýy múmkin.
Páranja kııýge tyıym salý týraly zań jobasy Belgııa parlamentinde de qaralyp jatyr. Aǵymdaǵy aptada Belgııa parlamentiniń tómengi palatasy páranja kııýge tyıym salǵan zań jobasyn maquldady. Atalmysh qujat áıelderge qoǵamdyq oryndarda betterin jabatyn kıimmen júrýge tyıym salady. Eger zań kúshine ense, zańdy buzýshylardy 25 eýroǵa deıin aıyppul nemese 7 kúnge deıin túrme kútip tur, dep jazady jergilikti basylymdar.
