Shvetsııanyń úsh partııasy eńbek mıgratsııasy erejelerin qaıta qaraýǵa kelisti
ASTANA.KAZINFORM — Shvetsııa sotsıal-demokratııalyq partııasy, Ortalyq partııa jáne Jasyldar partııasy birlesken úkimet qurý jónindegi kelissózder aıasynda birqatar saıası másele boıynsha aldyn ala ýaǵdalastyqqa qol jetkizdi, dep habarlaıdy AZERTADJ.
Negizgi usynystardyń biri — Tıde kelisimi aıasynda qabyldanǵan eńbek mıgratsııasy erejeleriniń kúshin joıý. Sonymen qatar taraptar qylmystyq jaýapkershilik jasyn burynǵy 15 jas deńgeıine qaıtarýdy, bilikti mamandar men jasóspirimderdi elden deportatsııalaýdy toqtatýdy jáne kámeletke tolmaǵan balalary bar ata-analarǵa qoıylatyn tabys talaptaryn jeńildetýdi usynyp otyr.
Budan bólek, ımmıgranttardyń qoǵamǵa beıimdelý úderisin jedeldetý, shaǵyn bıznestiń qyzmetker jaldaýǵa jumsaıtyn shyǵynyn azaıtý, Memlekettik jumyspen qamtý qyzmetin reformalaý jáne aýrýdyń alǵashqy kúnine tólenetin járdemaqydan ustalym jasaýdy toqtatý kózdelgen.
Usynystar paketine stomatologııalyq kómekti reformalaý da engizilgen. Oǵan sáıkes, eresekterdiń tis emdeýge jumsaıtyn shyǵyny emdeý qunynyń 10 paıyzyna deıin tómendetilmek. Sondaı-aq orman sharýashylyǵy saıasaty men bilim berý salasyna qatysty bastamalar bar.
Sotsıal-demokrattar Ortalyq partııaǵa usynǵan qujatta barlyǵy júzge jýyq bastama qamtylǵan. Olar yntymaqtastyqtyń 7 baǵytyna toptastyrylǵan. Atap aıtqanda, qarjy saıasaty, eńbek naryǵy, aýyldyq aımaqtardy damytý jáne qaýipsizdik máseleleri qarastyrylǵan.
Aıta keteıik, AQSh bıligi járdemaqy alatyndardy kóbirek jumys izdeýge mindettemek.