Shvetsııanyń sońǵy tabıǵı ormandary shırek ǵasyr ishinde joıylyp ketýi múmkin
ASTANA. KAZINFORM — Shvetsııadaǵy qundy tabıǵı ormandardy kesý qarqyny sońǵy jyldary kúrt ósti, dep habarlaıdy AZERTADJ.
Shvetsııa orman agenttiginiń jańa esebine sáıkes, eger qazirgi úrdis jalǵasa berse, taýdyń etegindegi sońǵy qorǵalmaǵan eski ormandar 25 jyl ishinde joıylyp ketýi múmkin. Qazir munda kún saıyn shamamen 100 fýtbol alańyna teń orman joıylady.
Vedomstvonyń málimetinshe, 2022 jyly ormannyń 6 myń gektar aýmaǵyndaǵy aǵashtar kesilgen. Jyl saıyn onyń kólemi artyp, qazirgi ýaqytta 26 myń gektarǵa deıin ósti. Bul aımaqtar bıoártúrlilikti jáne sırek kezdesetin túrlerdiń mekendeý ortasyn saqtaýda sheshýshi ról atqarady.
Elde shamamen 1,2 mıllıon gektar tabıǵı orman qorǵalmaǵan. Aǵash kesý qazirgideı jalǵasa berse, shırek ǵasyr ishinde 670 myń gektardan astam nýly alqap joıylýy múmkin.
Mamandar joǵalǵan tabıǵı ormandardy tez qalpyna keltirý múmkin emestigin eskertedi. Olardyń aıtýynsha, mundaı ekojúıeniń qalyptasýy úshin júzdegen jyl qajet, al jańa aǵashtardy otyrǵyzý eski tabıǵı ormandy tolyǵymen almastyra almaıdy.
Baıandama avtorlary bıologııalyq ártúrlilikti saqtaý úshin qorǵalatyn nemese qalpyna keltiriletin ormandar aýmaǵyn aıtarlyqtaı ulǵaıtý kerek dep sanaıdy.
Osyǵan deıin Shvetsııada azyq túlik pen janarmaı qymbattap jatqany týraly jazdyq.
