Almatyda Shvetsııadan kelgen dáriger 7 qazaqstandyqqa tegin operatsııa jasady
ALMATY. KAZINFORM –– Kardıologııa jáne ishki aýrýlar ǵylymı-zertteý ınstıtýtynda Shvetsııadan kelgen professordyń jetekshiligimen kúrdeli operatsııalar jasaldy.
Karolınsk ınstıtýtynyń (Stokgolm, Shvetsııa) professory Naýzad Salehtiń jetekshiligimen 7 patsıentke qolqa qaqpaqshasyn endovaskýlıarlyq aýystyrý boıynsha operatsııa jasaldy.
Qolqa – júrekten shyǵatyn iri qantamyr. Sol qantamyr jumysynda aqaý shyqsa jáne basqa aýrýlarmen qatar bolsa, patsıenttiń júregine ashyq operatsııa jasaý qaýipti. Mundaı jaǵdaıda qolqa qaqpaqshasyn aýystyrý rentgendik baqylaýmen jambas arterııasyn tesý arqyly jasalady. Biraq eń bastysy júrekti toqtatpaı jáne jasandy qan aınalymyn paıdalanbaı oryndalady. Medıtsınada bul operatsııany TAVI dep ataıdy.
Naýqastardyń biri - 87 jastaǵy Mıhaıl Fedorovıch, qolqa qaqpaqshasynyń aýyr stenozyna shaldyqqan. Ony júrek tusyndaǵy aýyrsyný, tynyshtyqta da paıda bolatyn júrek soǵysy, entigý, bas aýrýy mazalaǵan. Ol 1 jyl buryn entigý kúsheıgen kezde dıagnozyn bilgen. Kardıologııa jáne ishki aýrýlar ǵylymı-zertteý ınstıtýtyna elimizdegi jetekshi ınterventsııalyq kardıolog Alekseı Kolesnıkovqa júginý usynylǵan. Operatsııa sátti ótti.
– TAVI - eń qymbat operatsııalardyń biri, biraq patsıentter úshin tegin. Biz halyqqa joǵary bilikti kardıohırýrgııalyq kómek kórsetýdi jaqsartý boıynsha úzdiksiz jumys júrgizip jatyrmyz. Klınıkanyń ınterventsııalyq kardıologtarynyń joǵary kásibı sheberligi eń kúrdeli operatsııalardy jasaýǵa múmkindik beredi, – dep atap ótti Kardıologııa jáne ishki aýrýlar ǵylymı-zertteý ınstıtýtynyń basshysy Marat Pashımov.
Osyǵan deıin Kardıologııa jáne ishki aýrýlar ǵylymı-zertteý ınstıtýtynynyń dárigerleri reseılik áriptestermen birlesip kúrdeli júrek yrǵaǵynyń buzylýyn emdeýge arnalǵan qurylǵynyń kómegimen bes kúnde 30 operatsııa jasaǵan bolatyn.