Shvetsııadaǵy tabıǵı apat Norvegııanyń balyq eksportyna soqqy boldy

ASTANA. KAZINFORM — Shvetsııanyń Vesternorrland aımaǵyna jaýǵan kúshti nóser jaýyn ınfraqurylymǵa úlken zııan keltirip, el ishindegi jáne halyqaralyq logıstıkaǵa aıtarlyqtaı áser etti, dep habarlaıdy AZERTADJ.

Shvetsııanyń Kólik basqarmasynyń dereginshe, ondaǵan joldar men temirjol ýchaskeleri qırap, búlingen. Bul jaǵdaı ónerkásip, eksport jáne jolaýshylar tasymalyna keri yqpal etti.

Eń kóp zardap shekkenderdiń biri — Norvegııanyń Onrail júk operatory. Kompanııa Narvıkten Osloǵa kún saıyn shamamen 250 tonna aqserke men teńiz ónimderin tasymaldap kelgen. Bul ónimder Shvetsııa arqyly Japonııa, Frantsııa jáne ózge elderge eksporttalatyn. Alaıda temirjol qozǵalysy toqtap qalǵandyqtan, kompanııa endi Inlansbanan atty aınalma baǵytty paıdalanýǵa májbúr. Bul — bir jolaqty, elektrlendirilmegen, ótkizý qabileti tómen temirjol jelisi. Qazir ónimder tek kún ara tasymaldanyp jatyr. Sonyń saldarynan búkil norvegııalyq balyq ónerkásibi kún saıyn shamamen 20 mıllıon kron (1,8 mıllıon AQSh dollary) shyǵynǵa ushyrap jatyr.

Aımaqta barlyǵy 42 avtojol shaıylyp ketken. Úsheýi áli de jabyq. №90 ulttyq trassasy jaqyn kúnderi qaıta ashylýy múmkin, alaıda temirjol jelilerin qalpyna keltirýge kóp ýaqyt qajet.

Poıyzdar qozǵalysy keminde 15 qyrkúıekke deıin toqtap turady.

Qazirgi tańda Inlansbanan jelisimen eń aldymen azyq‑túlik pen dári‑dármek sekildi mańyzdy júk tıelgen poezdar ǵana júrip jatyr.

Shvetsııa bıligi bul jaǵdaıdyń tek aımaqpen shektelmeıtinin, ulttyq jáne halyqaralyq deńgeıde de saldary bar ekenin eskertip otyr.

Osydan buryn Vesternorrland qalasynyń soltústiginde nóser jaýyn saldarynan oq-dári tıelgen poıyz relsten shyǵyp ketkeni habarlandy.