Shvetsııada zorlyq-zombylyqqa qarsy mınıstrlik keńesi qurylady

ASTANA. KAZINFORM — Shvetsııa úkimeti áıelderge qatysty erler tarapynan jasalatyn zorlyq-zombylyqqa qarsy is-qımyldy kúsheıtý jáne nóldik tózimdilik saıasatyn qalyptastyrý maqsatynda arnaıy mınıstrlik keńes quratynyn málimdedi. Bul týraly AZERTADJ jazdy.

Bul bastama Rojdestvo merekesi kezinde elde bolǵan birqatar rezonansty qylmystan keıin premer-mınıstr Ýlf Krıstersson tarapynan jarııa etildi.

Ýlf Krısterssonnyń aıtýynsha, úkimet osyǵan deıin birqatar shara qabyldaǵan. Atap aıtqanda, áleýmettik qyzmet pen polıtsııa arasyndaǵy qupııalylyq kedergileri joıyldy, qaıtalanǵan aýyr zorlaý qylmystary úshin jaza kúsheıtildi, sondaı-aq aldyn alý maqsatynda qamaýda ustaý tetigi engizildi.

Premer-mınıstr bul zorlyq túrimen kúres uıymdasqan qylmysqa qarsy kúrespen birdeı tabandylyqpen júrgizilýi tıis ekenin atap ótti.

Jańa keńes uıymdasqan qylmysqa qarsy áreket etetin qoldanystaǵy qurylym úlgisinde qurylady jáne oǵan Ý. Krıstersson jetekshilik etedi.

Keńes quramyna ádilet mınıstri, genderlik teńdik jónindegi mınıstr, áleýmettik qyzmet vedomstvosynyń basshysy jáne psıhıatrııalyq kómekti qadaǵalaıtyn áleýmettik saıasat mınıstri kiredi.

Úkimet basshysy mundaı tragedııalardyń aldyn alý úshin sot júıesi, áleýmettik qyzmet pen densaýlyq saqtaý salasy arasynda tyǵyz úılestirý qajet ekenin erekshe atap ótti.

Aıta keteıik, Rojdestvo kúni Boden qalasynda 55 jastaǵy áıel óz úıinde qaza tapqan. Al 26 jeltoqsanǵa qaraǵan túni Rennıngede 25 jastaǵy áıel joǵalyp, keıin onyń máıiti tabylǵan.

Budan buryn Shvetsııa deportatsııalanbaıtyn qylmyskerlerge arnalǵan talaptardy qatańdatatynyn habarlady.