Shvetsııada júrek-qan tamyrlary aýrýlarynan bolatyn ólim eki ese tómendedi

ASTANA. KAZINFORM — Sońǵy 20 jylda Shvetsııada ınfarkt, ınsýlt jáne júrek jetkiliksizdigi sııaqty júrek-qantamyrlar aýrýlarynan bolatyn ólim-jitim eki ese azaıdy, dep habarlaıdy AZERTADJ.

Agenttiktiń habarlaýynsha, ótken jyly osy aýrýlardan shamamen 27 myń adam kóz jumdy, bul eldegi barlyq ólim-jitimniń úshten birin quraıdy.

Sarapshylardyń pikirinshe, bul jetistikke ómir saltynyń ózgerýi, áleýmettik-ekonomıkalyq jaǵdaıdyń jaqsarýy jáne medıtsınanyń damýynyń nátıjesinde qol jetkizilip otyr.

Qazir shvedter az temeki shegetin, alkogoldi az tutynatyn, kóbirek qozǵalys jasaıtyn jáne salaýatty tamaqtanatyn bolǵan.

Sonymen qatar, sońǵy onjyldyqtarda bilim men tabys deńgeıi aıtarlyqtaı ósti, bul da qaýip-qaterdi tómendetedi. Mysaly, Stokgolmde tabysy joǵary er adamdar ortasha eseppen tabysy eń tómen er adamdarǵa qaraǵanda toǵyz jyl uzaq ómir súredi. Áıelderde bul aıyrmashylyq shamamen bes jyldy quraıdy.

Jańa dári-dármekter men medıtsınalyq tehnologııalar, mysaly, kardıostımýlıatorlar jáne ımplanttalatyn defıbrıllıatorlar, júrek jetkiliksizdigimen aýyratyn 200 myń shvedtiń ómir súrý múmkindigin aıtarlyqtaı arttyrdy. Bul aýrý júrektiń júktemege tótep bere almaýy saldarynan ólimge ákelýi múmkin.

Qan qysymy men holesterındi tómendetetin qazirgi zamanǵy dáriler, sonyń ishinde statınder men jańa antıkoagýlıanttar, sondaı-aq jetildirilgen emdeý ádisteri myńdaǵan adamnyń ómirin saqtaýǵa múmkindik berdi.

Budan buryn Norvegııa genderlik teńdik reıtınginde Shvetsııany basyp ozǵanyn jazǵanbyz.