Shvetsııada joǵary jumyssyzdyq deńgeıi tirkeldi

ASTANA. KAZINFORM — Shvetsııa Eýropalyq Odaqtaǵy jumyssyzdyq deńgeıi eń joǵary elderdiń biri, dep habarlaıdy AZERTADJ.

Ol 20-64 jas aralyǵyndaǵy jumyssyzdyq boıynsha EO elderi arasynda jetinshi orynda tur.

Pandemııa kezeńin qospaǵanda, qazirgi jumyssyzdyq deńgeıi sońǵy 14 jyldaǵy eń joǵary kórsetkish sanalady. Bul ekonomıkalyq quldyraýmen jáne tereń qurylymdyq máselelermen baılanysty.

Agenttik habarlaýynsha, jumyssyzdyq ásirese belgili bir toptar arasynda joǵary: Eýropadan tys jerde týǵan adamdar, orta bilimi joqtar, egde jastaǵy qyzmetkerler jáne múmkindigi shekteýli jandar.

Jumyssyzdar sany kóp bolǵanymen, Shvetsııa medıtsına, bilim jáne tehnıkalyq mamandyqtar sııaqty salalarda bilikti jumys kúshiniń jetispeýshiligine tap bolyp otyr. Shved eńbek naryǵy bilimge joǵary talap qoıady, al biliktilik talap etilmeıtin jumys oryndarynyń úlesi óte tómen — nebári 4%, bul EO-nyń basqa elderimen salystyrǵanda aıtarlyqtaı az.

Shvetsııadaǵy jumyssyzdardyń basym bóligi — bilim deńgeıi tómen adamdar jáne olardyń úlesi artyp keledi. Munyń sebepteri ımmıgratsııanyń ósýimen jáne orta mektepti bitirmeıtin jastar sanynyń artýymen baılanysty. Ásirese, Aýǵanstan men Somalı sııaqty ál-aýqaty tómen elderden kelgen ımmıgratsııa halyq quramyn edáýir ózgertti.

Immıgranttar tildik kedergi, tómen biliktilik, kemsitýshilik, áleýmettik oqshaýlaný jáne basqa da kommýnıkatsııalyq faktorlarǵa baılanysty eńbek naryǵynda qıyndyqtarǵa tap bolady. Afrıkadan kelgen ımmıgranttar arasyndaǵy jumyssyzdyq deńgeıi 28% qurasa, Eýropadan kelgender arasynda bul kórsetkish nebári 6%.

Osylaısha, Shvetsııadaǵy joǵary jumyssyzdyq deńgeıi ekonomıkalyq faktorlardyń, bilim berý alshaqtyǵynyń, eńbek naryǵy modeliniń erekshelikteriniń jáne ımmıgranttardy qoǵamǵa ıntegratsııalaýdyń kúrdeliliginiń úılesimimen túsindiriledi.

Buǵan deıin Shvetsııa mıgranttardy eline qaıtarý úshin 32 myń eýro tóleıtini anyqtaldy.