Shvetsııada jynysty zań júzinde aýystyrý rásimin qaıta qarastyrý usynyldy

ASTANA. KAZINFORM —  Shved premer-mınıstri Ýlf Krıstersson basqaratyn partııa 2025 jylǵy 1 shildeden bastap kúshine engen jynysty ózgertý týraly jańa zańdy qaıta qaraýdy josparlap otyrǵanyn málimdedi. Bulnorma zańdy jynysty aýystyrý rásimin jeńildetken, dep habarlaıdy AZERTADJ.

AZERTADJ habarlaýynsha, zań boıynsha genderlik dısforııa dıagnozyn qajet etý talabynan bas tartylyp, onyń ornyna medıtsınalyq qorytyndy jetkilikti bolyp, mınımaldy jas 18-ten 16 jasqa tómendetilgen.

Zańdy qaıta qaraýdyń sebebi – qoǵamdyq rezonans týdyrǵan keıbir jaǵdaılar, sonyń ishinde balalaryn óltirgeni úshin sottalǵan adam zańdy jynysyn ózgertken soń áıelder túrmesine aýystyrylýy tıis bolǵan oqıǵa. Partııa basshylyǵy zańnyń saldaryn, ásirese ótinishter sanynyń ósýin, áıelderdiń qaýipsizdigine áserin jáne qylmyskerler tarapynan zańdy teris paıdalaný qaýpin baǵalaý qajettigin atap otyr. Partııa zańdy jynysty ózgertý qylmyskerlerdiń polıtsııaǵa tirkeý men izdeýdi qıyndatatyn quralǵa aınalmaýyn qamtamasyz etkisi keledi.

Qazirgi ýaqytta bul zań bılik koalıtsııasynda da daýly másele bolyp otyr. Shved demokrattary men Hrıstıan demokrattary oǵan qarsy shyǵyp, tolyqtaı joıýdy talap etedi. Hrıstıan demokrattarynyń lıderi Ebba Býsh zań bastapqyda qate jasalǵanyn jáne ony tolyqtaı joıý qajet ekenin aıtty.

Budan buryn Shvetsııa úkimeti áıelderge qatysty erler tarapynan jasalatyn zorlyq-zombylyqqa qarsy is-qımyldy kúsheıtý jáne nóldik tózimdilik saıasatyn qalyptastyrý maqsatynda arnaıy mınıstrlik keńes quratynyn málimdedi.