Shvetsııada jel elektr stantsııalaryna qatysty qarjy daýy kúsheıdi

ASTANA. KAZINFORM – Shvetsııada jel elektr stantsııalary ornalasqan mýnıtsıpalıtetterge qarajat tólemeý narazylyqty kúsheıtti.

AZƏRTAC habarlaýynsha, úkimet 2025 jyly 340 mln shved kronyn (30,9 mln dollar) jáne kelesi jyldary qosymsha qarajat bólýdi ýáde etken. Bul qadam jel energetıkasynyń damýyn yntalandyrýǵa jáne jergilikti bılik organdaryna túsetin júktemeni óteýge tıis edi. Alaıda jyl sońyna nebári birneshe aı qalsa da, áli kúnge deıin bir kron da aýdarylmaǵan.

Kidiris sala ókilderi men jergilikti saıasatkerlerdiń ashý-yzasyn týdyrdy. Onge mýnıtsıpalıtetiniń komıssary Erık Levgren atap ótkendeı, halqy nebári 9 myńnan sál asatyn shaǵyn qaýym úshin ýáde etilgen shamamen 16 mln krona (1,5 mln dollar shamasynda) — aıtarlyqtaı qarajat.

– Biz bul aqshaǵa úmit artyp otyrmyz. Elektr energııasy óndirisi artýy tıis, biraq atom elektr stantsııalary keminde on jyldan keıin ǵana paıda bolady, al jel energetıkasynyń damýy qazirdiń ózinde baıaýlady, – dep atap ótti E. Levgren.

Westander Klimat och Energi konsaltıngtik kompanııasynyń derekterine sáıkes, bıyl mýnıtsıpalıtetter josparlanǵan jel energetıkasy jobalarynyń 95%-dan astamyn toqtatty nemese toqtatýdy kózdep otyr.

Oppozıtsııalyq partııalar da qatań reaktsııa bildirdi. Jasyldar partııasynyń energetıkalyq saıasat jónindegi ókilderi úkimetti «asa iri deńgeıdegi nekompetenttikke» aıyptap, energetıka jáne ónerkásip mınıstri Ebba Býshty parlament komıtetinde esep berýge shaqyrýdy talap etti. Sotsıal-demokrattar da qysqa ýaqyt ishinde úkimet jel energetıkasyn damytý jaǵdaılaryn kúrt nasharlatty dep sanaıdy.

Mınıstr Ebba Býsh qoldaý tetiginiń kúrdeli ekenin jáne kóptegen faktordy eskerýi tıis ekenin atap ótti. Degenmen ol mýnıtsıpalıtetter ótemaqy alatynyna sendirip, másele qaralyp jatqanyn, aldaǵy ýaqytta úkimet bul taqyrypqa qaıta oralatynyn aıtty.

Sala sarapshylary eger naqty erejeler men ýaqytyly qoldaý bolmasa, Shvetsııadaǵy jel energetıkasy toqtap qalýy múmkin ekenin, bul elektr baǵasynyń ósýine jáne elektrlendirý josparlarynyń buzylýyna ákeletinin eskertedi.

Aıta ketelik Shvetsııada bıyl alǵash ret azyq-túlik baǵasy tómendedi.