Shvetsııada jastar arasynda ishek qaterli isigine shaldyqqandar sany artyp keledi

ASTANA. KAZINFORM — Sońǵy otyz jylda Shvetsııada toq ishek pen tik ishek qaterli isigine shaldyqqan jastar sany úsh esege jýyq artqan, dep jazdy AZERTADJ.

Bul qorytyndyny Karolın ınstıtýtynyń zertteýshileri 1993–2019 jyldar aralyǵynda 135 000-nan astam naýqastyń derekterin taldaý arqyly jasaǵan.

Buryn bul aýrý negizinen 65 jastan asqan adamdarda kezdesetin bolsa, qazir ol 50 jasqa deıingi tulǵalarda jıilep barady. Ǵalymdardyń aıtýynsha, dástúrli qaýip faktorlary — tuqym qýalaýshylyq pen ishektiń qabyný aýrýlary — bul kórsetkishtiń ósýin tolyq túsindire almaıdy. Múmkin sebepter retinde balalyq shaqtaǵy semizdik, qozǵalyssyz ómir salty jáne antıbıotıkterdi keńinen qoldaný atalady, biraq naqty mehanızmder áli anyq emes.

Sondaı-aq, jas patsıentterde aýrý jıi kesh kezeńde anyqtalady. Bul sımptomdardy uzaq ýaqyt boıy elemeýmen baılanysty bolýy múmkin.

Statıstıka boıynsha, Shvetsııada jyl saıyn shamamen 5500 toq ishek qaterli isigi jáne 2600 tik ishek qaterli isigi tirkeledi. Sońǵysy kóbine erkekter arasynda jıi kezdesedi.

Eske sala keteıik, buǵan deıin Shvetsııada ishek ınfektsııasy órship turǵanyn jazǵan edik. Campylobacter bakterııasy 200-den astam adamǵa juqqan.