Shvetsııada úsh jańa atom elektr blogy salynady
ASTANA. KAZINFORM — Shvetsııada jumys istep turǵan Rınghals atom elektr stantsııasynda jalpy qýaty 1410 MVt úsh jańa ıadrolyq reaktor salý josparlanǵan, dep habarlaıdy AZERTADJ.
Reaktorlyq tehnologııalardy jetkizýshi retinde brıtandyq Rolls-Royce SMR kompanııasy tańdaldy. Joba energetıkalyq Vattenfall kompanııasy men Industrikraft konsortsıýmynyń qatysýymen júzege asyrylady. Al Shvetsııa úkimeti bul jobaǵa 30 mıllıardtan astam shved kronyn (shamamen 3 mlrd AQSh dollary) ınvestıtsııalaýdy josparlap otyr.
Buǵan deıin irikteýdiń sońǵy kezeńinde eki úmitker qarastyrylǵan bolatyn — amerıkalyq GE Vernova Hitachi jáne Rolls-Royce SMR. Baǵalaý nátıjesinde brıtandyq kompanııanyń usynysy tańdaldy. Sebebi onyń ınvestıtsııalyq jáne paıdalaný shyǵyndary tómenirek bolyp, qurylys táýekelderi de az dep tanyldy.
Joba aıasynda qýaty 470 MVt bolatyn úsh reaktor salý kózdelgen. Olardyń jalpy elektr energııasyn óndirý kólemi jylyna shamamen 12 TVt saǵat. Bul Shvetsııadaǵy qazirgi elektr energııasy óndirisiniń shamamen 7,5 paıyzyna teń.
Joba boıynsha túpkilikti ınvestıtsııalyq sheshim áli qabyldanǵan joq. Josparǵa sáıkes, alǵashqy energoblok 2030 jyldardyń ortasyna deıin iske qosylmaýy múmkin. Al úsh reaktordyń tolyq qýatta jumys isteýi 2040 jyldardyń basyna josparlanǵan.
Shvetsııa energetıkalyq strategııasy aıasynda atom energetıkasyn damytý arqyly elektr energııasyn óndirý kólemin arttyrýdy kózdeıdi. El 2035 jylǵa deıin keminde 2500 MVt jańa ıadrolyq qýattardy paıdalanýǵa berýdi josparlap otyr.
Aıta keteıik, Qazaqstan men Frantsııa atom energetıkasy salasyndaǵy yntymaqtastyqty keńeıtpek.
