Shvetsııada turmystyq zorlyq-zombylyqty tergeý kúsheıtiledi
ASTANA. KAZINFORM — Shvetsııada qylmystardy, sonyń ishinde otbasyndaǵy zorlyq-zombylyq oqıǵalaryn tergeý kezinde sot-medıtsınalyq saraptama qorytyndylaryn keńinen paıdalaný josparlanyp otyr, dep habarlaıdy AZERTAJD agenttigi.
Bul týraly Shvetsııanyń Ulttyq sot-medıtsınalyq basqarmasynyń ókilderi zorlyq-zombylyqqa qarsy kúreske arnalǵan «Qyzǵylt sary apta» aıasynda málimdedi.
Mamandardyń aıtýynsha, turmystyq zorlyq-zombylyqty tergeý kezinde sot-medıtsınalyq saraptama qorytyndylarynyń mańyzy zor. Óıtkeni mundaı qylmystar kóbine kýágersiz jasalady.
Saraptama dene jaraqattarynyń sıpaty men qashan salynǵanyn, olardyń paıda bolý sebepterin, sondaı-aq zardap shekkenderdiń densaýlyǵyna tıgizgen zardabyn anyqtaýǵa múmkindik beredi.
Buǵan qosa mamandar zardap shekkenderdiń polıtsııaǵa ýaqytyly júginbeýin basty máselelerdiń biri dep sanaıdy.
– Ýaqytty ótkizip almaý qajet. Óıtkeni kógergen jerler birtindep basylyp, teridegi zaqymdar joǵalady, al jaralar jazylyp ketedi, – dep atap ótti sarapshylar.
Bir jyl boıy Shvetsııanyń Ulttyq sot-medıtsınalyq basqarmasy úkimettiń tapsyrmasymen polıtsııa jáne prokýratýra organdarymen birlesip, qylmystyq isterdi tergeý kezinde sot-medıtsınalyq saraptama qorytyndylaryn paıdalaný aıasyn keńeıtý baǵytynda jumys júrgizdi.
Bul rette medıtsınalyq mekemelermen baılanysty nyǵaıtýǵa jáne dene jaraqattaryn tirkeý ádisterin jetildirýge basa nazar aýdarylyp otyr.
Al vedomstvo atqarylǵan jumys nátıjesin 2027 jylǵy 2 sáýirge deıin Shvetsııanyń Ádilet mınıstrligine usynýǵa tıis.
Buǵan deıin Quryltaı depýtaty Larısa Lıdiń Qazaqstanda «PANA» áleýmettik jobasynyń qaýipsiz nysandar jelisin qurýdy usynǵany habarlanǵan bolatyn.