Shvetsııada tramvaı apaty saldarynan segiz adam jaraqat aldy

ASTANA. KAZINFORM – Jumaǵa qaraǵan túni Geteborg qalasynyń ortalyǵynda iri jol apaty boldy. Tramvaı relsten shyǵyp ketip, joǵary jyldamdyqpen Avenın dańǵylyndaǵy tamaqtaný ornyna soǵyldy. 

AZƏRTAC agenttiginiń habarlaýynsha, oqıǵa saldarynan segiz adam zardap shekti, olardyń qatarynda tramvaı júrgizýshisi de bar. Polıtsııanyń málimetinshe, zardap shekkenderdiń eshqaısysy ómirine qaýip tóndiretin jaraqat almaǵan.

Aldyn ala aqparat boıynsha, tramvaı kúrt burylysta qozǵalysty baqylaýdan shyǵaryp alyp, qarsy bettegi trotýarǵa shyǵyp ketken jáne pıtstserııa ornalasqan ǵımarattyń qasbetine soǵylǵan. Oqıǵa bolǵan sátte dámhananyń ishinde adamdar bolǵan.

Kýágerlerdiń aıtýynsha, zardap shekkenderge alǵashqy bolyp ótip bara jatqan adamdar kómekke kelgen. Olar qutqarý qyzmeti kelgenge deıin tramvaıdyń esikterin ashyp, ishindegi jolaýshylardy shyǵaryp úlgergen. Apat bolǵan aýdan jedel túrde qorshaýǵa alynyp, tramvaıdy evakýatsııalaý jumystary bastaldy.

Polıtsııa bul oqıǵa boıynsha jol qozǵalysy erejesin óreskel buzý jáne densaýlyqqa aýyr zııan keltirý baptary boıynsha is qozǵady. Qazir oqıǵanyń sebepteri anyqtalýda, tergeý Geteborg qalalyq tramvaı qyzmetimen birlese júrgizilip jatyr. 

Aıta ketelik Shvetsııada daıyndyq synyptary joıylyp, on jyldyq oqý engiziletini týraly jazǵan edik.