Shvetsııada tegin EKO jasaý sharttaryn keńeıtý usynyldy
ASTANA.KAZINFORM - Shvetsııa premer-mınıstri Ýlf Krıstersson jetekshilik etetin «Ýmerennye» partııasy tegin ekstrakorporaldy uryqtandyrýǵa (EKO) qoljetimdilikti keńeıtýdi usynyp otyr, dep habarlaıdy Azertadj.
Usynysqa sáıkes, memleket qarjylandyratyn EKO-nyń úsh tegin áreketi tek balasy joq juptarǵa ǵana emes, ekinshi balaly bolǵysy keletin otbasylarǵa da qoljetimdi bolýy múmkin.
— Bul kóptegen otbasynyń ómirinde óte mańyzdy ról atqarýy yqtımal, — dedi Krıstersson.
Bastama «Pozvonı premer-mınıstrý» podkastynda aıtyldy jáne partııanyń saılaýaldy ýádeleriniń birine aınalýy múmkin. Qazir Shvetsııa elinde tegin EKO tek balasy joq juptarǵa ǵana usynylady, al qalǵandary protsedýrany óz qarajatyna jasatady.
Jańa usynys bıleýshi koalıtsııa arasyndaǵy qazirgi kelisimderden de asyp túsedi. Premer-mınıstr bul shara týý kórsetkishi tómendep jatqan eldegi otbasylardy qoldaýǵa kómektesetinin aıtty. Qazirgi tańda Shvetsııadaǵy týý kórsetkishi bir áıelge shaqqanda shamamen 1,4 bala bolyp otyr.
Sondaı-aq partııa EKO-ǵa qoljetimdilik erejelerin qaıta qaraýdy, onyń ishinde 40 jastan asqan áıelder úshin jumyrtqa jasýshalaryn qatyrý múmkindigin de usyndy.
Buǵan deıin Qytaı ǵalymdary ınsýlt kezinde kómek kórsetýge arnalǵan álemdegi alǵashqy muryn spreıin ázirlegeni habarlanǵan edi.
Aıta ketelik jasandy uryqtandyrýǵa 30 jasqa tolmaǵan azamattar júgine bastaǵany týraly jazǵan edik.
