Shvetsııada sońǵy bir jylda jumyssyzdar sany artqan
ASTANA. KAZINFORM — Jalpy jumyssyzdyq deńgeıi 8,8 paıyzǵa jetip, bul shamamen 510 myń adamǵa sáıkes keledi, dep habarlaıdy Azertadj.
Bul týraly Shvetsııanyń statıstıkalyq basqarmasy (SCB) málimetteri kórsetip otyr. Vedomstvo deregine sáıkes, 27 aptadan astam ýaqyt jumyssyz júrgen adamdar sany 19 myńǵa kóbeıip, shamamen 171 myń adamǵa jetken. Bul eldegi jalpy jumyssyzdardyń shamamen 36 paıyzy.
Jalpy jumyssyzdyq deńgeıi 8,8 paıyzǵa jetip, bul shamamen 510 myń adamǵa sáıkes keledi. Al Jumyspen qamtý qyzmetiniń derekterine sáıkes, keminde 12 aı boıy jumyssyz retinde tirkelgen adamdar sany 151 570 adam bolǵan, bul ótken jylmen salystyrǵanda 1,3 paıyzǵa ósken.
Taldaý nátıjeleri boıynsha, ásirese 55 pen 66 jas aralyǵyndaǵy adamdar osal top bolyp qalyp otyr. Olardyń uzaq merzimdi jumyssyzdar arasyndaǵy úlesi 18–24 jas aralyǵyndaǵy jastarmen salystyrǵanda shamamen úsh ese joǵary. Sonymen qatar, vedomstvonyń málimetinshe, egde jastaǵylar jumysynan sırek aıyrylǵanymen, jumystan shyqqan jaǵdaıda uzaq ýaqyt boıy jumys taba almaıdy.
Joǵary táýekel tobyna Eýropadan tys elderde týǵan adamdar, orta bilimi joq azamattar jáne eńbekke qabilettiligi shekteýli adamdar da kiredi. Keıbir azamattar bir ýaqytta birneshe sanatqa jatýy múmkin, bul olardyń eńbek naryǵyndaǵy jaǵdaıyn odan ári qıyndatady.
Sarapshylar uzaq merzimdi jumyssyzdyqtyń ósýin birneshe faktorlarmen baılanystyrady.
Olardyń qatarynda ekonomıkanyń qurylymdyq ózgeristeri, jumys berýshiler talap etetin daǵdylardyń sáıkes kelmeýi jáne jas ereksheligine baılanysty kemsitýshilik bar. Zertteýlerge sáıkes, jumys berýshilerdiń jaýap berý yqtımaldyǵy 40 jastan keıin-aq tómendeı bastaıdy.
Sonymen birge jastar uzaq merzimdi jumyssyzdyqqa sırek ushyraıdy, sebebi olar kóbine ýaqytsha jumys pen oqýdy qatar alyp júredi jáne eńbek naryǵyna beıimdelgish keledi.
Degenmen joǵary bilimi bar jastar arasynda da uzaq merzimdi jumyssyzdyqtyń ósýi baıqalǵan, bul ekonomıkalyq quldyraýdyń saldarymen túsindiriledi. Sarapshylar eńbek naryǵy jaqsarǵan jaǵdaıda jumys kúshine suranys artyp, eń aldymen suranysqa ıe daǵdylary bar bilikti mamandarǵa oń áser etetinin kútýde.
Aıta ketelik Shvetsııada eńbek naryǵyn teńestirý úshin kóshýge járdemaqy engizilýi múmkin.
