Shvetsııada ishek ınfektsııasy órship tur: Campylobacter bakterııasy 200-den astam adamǵa juqqan

ASTANA. KAZINFORM – Sońǵy aptalarda Shvetsııada Campylobacter bakterııasy týyndatqan ishek ınfektsııasynyń kúrt ósýi baıqalyp otyr. 

AZƏRTAC agenttiginiń habarlaýynsha, Shvetsııanyń Qoǵamdyq densaýlyq saqtaý agenttigi maýsym aıynyń basynda 30 jaǵdaı tirkelse, ótken aptada bul kórsetkish 200-den asty dep málimdedi.

Mamandardyń aıtýynsha, mundaı ósý maýsymdyq sıpatqa ıe jáne ádette tamyz aıynda shegine jetedi. Basty juqtyrý kózi — taýyq eti. Campylobacter adamda dıareıa, dene qyzýynyń kóterilýi men júrek aınýdy týdyrady. Kóp jaǵdaıda aýrý belgileri birneshe kún ishinde ózdiginen basylady. Aýyr túrleri sırek kezdesedi.

Juqtyrýdyń aldyn alý úshin mamandar etti keminde 70°C temperatýrada jaqsylap pisirýdi, shıki jáne daıyn taǵamǵa bir ydysty paıdalanbaýdy, sondaı-aq as úıdegi gıgıena erejelerin qatań saqtaýdy usynady. Bakterııa pasterlenbegen sút, úı janýarlary jáne lastanǵan sý arqyly da juǵýy múmkin.

Atalǵan ınfektsııa túri mindetti túrde tirkelýi tıis, al sý nemese taǵammen baılanysty yqtımal juqpalar týraly jergilikti ekologııalyq baqylaý organdaryna dereý habarlanýy qajet. 

Aıta ketelik shetelde ınfektsııalyq aýrýlardan qalaı saqtanýǵa bolatyny týraly jadyma jarııalaǵan edik.