Shvetsııada saıasatkerlerge qarsy agressııa kúsheıip barady

ASTANA. KAZINFORM — Sońǵy ýaqytta Shvetsııa saıasatkerlerine jasalatyn qorqytýlar men shabýyldar kúrt artyp otyr, dep jazady AZERTADJ.

Shvetsııanyń Qylmystyń aldyn alý jónindegi ulttyq keńesiniń (Brå) «Saıası qaýipsizdik» atty zertteýine sáıkes, sońǵy on jylda qoqan-loqy men qysym kórgen saıasatkerler sany eki ese artqan. 2022 jyly árbir úshinshi saıasatker osyndaı oqıǵalarǵa tap bolǵanyn málimdegen.

Sársenbi kúni Tsentrıstik partııanyń jetekshisi Anna-Karın Hatt otstavkaǵa ketetinin jarııalady. Ol ózine baǵyttalǵan óshpendilik pen qorqytýlar ózi kútkeninen de qatty áser etkenin aıtyp, bul sheshimdi qabyldaýǵa májbúr bolǵanyn jetkizdi. Bul jaǵdaı Shvetsııada saıasatkerlerge qarsy agressııa men qysymnyń qanshalyqty kúrdeli máselege aınalǵanyn taǵy bir dáleldeıdi.

Ásirese, rıksdag depýtattary men áleýmettik jelilerde belsendi saıasatkerler qaýip-qaterge jıi ushyraıdy. Internet – agressııanyń basty kózine aınalǵan. 2012 jyldan 2022 jylǵa deıin jelidegi qorqytýlar sany eki ese ósken.

Brå derekterine sáıkes, qorqytýlardyń basym bóligi — orta jastaǵy beıtanys er adamdardan keledi. Olardyń shamamen jartysy túrli toptarmen baılanysty adamdar. Oqıǵalardyń eń kóp bóligi — shamamen 17 paıyzy — ásireońshyl jáne násilshil uıymdardyń áreketimen baılanysty. Al solshyl radıkaldy toptar 8 paıyzǵa jýyq oqıǵaǵa sebepshi bolǵan.

16 paıyz jaǵdaıda qorqytýlar basqa saıasatkerlerden, kóbine qarsy partııa ókilderinen keledi. Fızıkalyq zorlyq-zombylyq pen vandalızm sırek kezdeskenimen, elde saıasatkerlerge degen óshpendilik deńgeıi údep keledi.

Budan buryn Shvetsııada aýyr qylmys jasaǵan balalardy jazalaý máselesi talqylandy.