Shvetsııada parlament saılaýy ótip jatyr
ASTANA. KAZINFORM – Shvetsııada Rıksdagpen qatar aımaqtyq jáne mýnıtsıpaldyq keńesterge saılaý ótip jatyr, dep habarlaıdy EO-daǵy Kazinform tilshisi.
Daýys berý ýchaskeleri jergilikti ýaqyt boıynsha saǵat 08:00-den 20:00-ge deıin jumys isteıdi. Daýys berý quqyǵyna 8 mln-nan astam azamat ıe. Saılaýshylardyń shamamen jartysy 26 tamyzda bastalǵan merziminen buryn daýys berýge qatysyp úlgergen.
Shvetsııa parlamentinde 349 oryn bar. Kópshilik daýysqa ıe bolý úshin keminde 175 mandat qajet. Sonymen qatar aımaqtyq jáne mýnıtsıpaldyq keńesterge depýtattar saılanady.
Aldyn ala saýalnamalarǵa qaraǵanda, Magdalena Andersson bastaǵan Sotsıal-demokratııalyq partııanyń solshyl-tsentrıstik blogy men premer-mınıstr Ýlf Krıstersson jetekshilik etetin ońshyl-tsentrıstik bloktyń qoldaýy shamalas.
Ońshyl blokqa Ýmerettelgen partııa, Hrıstıan-demokrattar, Lıberaldar jáne «Shved demokrattary» kiredi. Eger ońshyldar kópshilikti saqtap qalsa, «Shved demokrattary» alǵash ret úkimet quramynan mınıstrlik laýazymdarǵa ıe bolýy múmkin. Sońǵy tórt jylda Krıstersson úkimeti bul partııanyń parlamenttegi qoldaýyna súıengenimen, onyń ókilderin kabınetke engizbegen.
Saılaý naýqanynda densaýlyq saqtaý, bilim berý, qylmys, ımmıgratsııa jáne ekonomıka negizgi máseleler boldy.
Shvetsııada saılaýshylardyń belsendiligi dástúrli túrde joǵary – 80%-dan asady. Rıksdag saılaýynyń alǵashqy aldyn ala nátıjeleri daýys berý kúni keshke jarııalanady.
Shvetsııa 2024 jyldan beri NATO múshesi. Bul – eldiń osy alıansqa qosylǵannan keıingi alǵash ótkizilip otyrǵan parlament saılaýy.
Aıta keteıik, buǵan deıin Shvetsııada jańa parlament quramy saılanatynyn jazǵan edik.
