Shvetsııada oqý ornyndaǵy atys kezinde 10-ǵa jýyq adam mert boldy

ASTANA. KAZINFORM – Polıtsııanyń habarlaýynsha, Shvetsııanyń ortalyǵyndaǵy Erebrý qalasyndaǵy balalar mektebiniń janyndaǵy eresekterge arnalǵan bilim berý ortalyǵynda adamdarǵa oq jaýdyrǵan er adam qaza tapty, dep habarlaıdy VVS.

Qalalyq polıtsııa basshysy Roberto Eıd Forest oqıǵa saldarynan «shamamen 10 adamnyń» mert bolǵanyn, onyń ishinde oq jaýdyrǵan er adamnyń da qaza tapqanyn rastady. Polıtsııa ázirge qurbandardyń naqty sanyn jarııalaǵan joq.

Qylmysker týraly belgili aqparat – ol polıtsııaǵa buryn tanys emes jáne eshqandaı uıymdasqan qylmystyq topqa qatysy bolǵan joq. Polıtsııa shabýyldy ázirge lańkestik áreketpen de baılanystyryp otyrǵan joq.

- Biz qylmysker jalǵyz áreket etti dep oılaımyz, - dedi Forest.

Ol bul «óte qaıǵyly oqıǵaǵa» qatysty tergeý óte erte kezeńde ekenin qosyp ótti. Shvetsııa premer-mınıstri Ýlf Krıstersson shuǵyl baspasóz máslıhatynda mekteptegi atys qurbandar sany jaǵynan el tarıhynda buryn-sońdy bolmaǵan oqıǵa ekenin málimdedi.

Onyń aıtýynsha, Shvetsııada «eshqashan jol berilmeýi tıis oqıǵa boǵan». Premerdiń qasynda turǵan ádilet mınıstri Gýnnar Strommer Shvetsııa «mektepte mundaı masshtabtaǵy atys bolǵanyn eshqashan kórmegenin» qaıtalady. Strommer sonymen birge qaza tapqandar arasynda polıtsııaǵa buryn belgisiz bolǵan shabýylshynyń ózi de bar ekenin rastady.

- Qaza tapqandardyń biri qazir basty kúdikti sanalyp otyr. Ol buryn polıtsııaǵa belgisiz bolyp kelgen jáne bul oqıǵa nelikten bolǵanyn áli kúnge deıin bilmeımiz, - dedi mınıstr.

Bılik qala turǵyndaryn budan ári shabýyldy kútýge negiz joq, sondyqtan erteń tańerteń balalardy esh qoryqpastan mektepke ádettegideı jiberýge bolatynyna sendirdi.

Erebrý – Shvetsııada halyq sany boıynsha altynshy mýnıtsıpalıtet, onda shamamen 125 myń adam turady.

Oqıǵa keshe jergilikti ýaqyt boıynsha saǵat 13:00 shamasynda, negizinen bastaýysh nemese orta mektepti aıaqtamaǵandar baratyn eresekterge arnalǵan bilim berý ortalyǵynda boldy. Ol birneshe oqý oryndaryn, sonyń ishinde balalarǵa arnalǵan mektepti qamtıtyn kampýsta ornalasqan. Bastapqy habarlamalarda oqıǵa mektepte bolǵany aıtylǵan.

Oqıǵa ornyna polıtsııa, jedel járdem qyzmetkerleri jáne qutqarýshylar jiberildi, al bılik ókilderi adamdardy aımaqtan alys júrýge shaqyrdy.

Oqıǵa ornynan túsirilgen kadrlarda ondaǵan qarýly polıtsııa qyzmetkerleri, kóptegen jedel járdem jáne shuǵyl qyzmet kólikterin kórýge bolady.

Oqıǵa týraly polıtsııanyń alǵashqy málimdemesinde bes qurban bolǵany aıtylǵan.

- Oqıǵa qazirgi ýaqytta kisi óltirýge oqtalý, órteý jáne aýyrlatatyn mán-jaılarda qarý qoldanyp qylmys jasaý retinde qarastyrylyp jatyr, - delingen baspasóz habarlamasynda.

Aıta keteıik, Latvııa Shvetsııamen aradaǵy sýasty kabeliniń zaqymdalǵanyn habarlady.