Shvetsııada meshitti órteý deregi boıynsha tergeý bastaldy

ASTANA. KAZINFORM — Lýleo qalasynda jańa meshittiń qurylysy aıaqtalýǵa jaqyn qalǵan edi. Alaıda ǵımarattan órt shyqty. Qazir polıtsııa bul oqıǵaǵa baılanysty tergeý júrgizip jatyr. Olar órttiń qasaqana qoıylǵan bolýy múmkin ekenin joqqa shyǵarmaıdy.

AZERTADJ agenttiginiń habarlaýynsha, kóshede ótip bara jatqan adam ǵımarattan shyqqan jalyndy baıqap, qutqarý qyzmetine dereý habar bergen.

Órt sóndirýshiler oqıǵa ornyna jedel jetip, jalynnyń búkil ǵımaratqa taralýyna jol bermegen. Negizgi zaqym ǵımarattyń bir buryshyna kelgen, zardap shekkender joq.

Polıtsııa qyzmetkerleriniń aıtýynsha, oqıǵa ornynda tehnıkalyq tekserý júrgizilip jatyr. Onyń nátıjeleri kelesi aptada belgili bolady.

Qazir bul oqıǵa boıynsha «qasaqana ot qoıý» baby boıynsha tergeý amaldary júrip jatyr, biraq ázirge kúdiktiler anyqtalǵan joq.

Meshittiń qurylysyn júrgizýge jaýapty Norrbotten Islam ortalyǵynyń ókili Býrhan Kanbardyń aıtýynsha, meshitti ashý birneshe aıdan keıin josparlanǵan bolatyn, alaıda bul oqıǵadan keıin naqty merzimi belgisiz bolyp otyr.

— Maǵan habarlasyp, ǵımarattyń janyp jatqanyn aıtty. Baqytymyzǵa oraı, órt tarap úlgermegen, — dedi ol. 

Sondaı-aq ol jergilikti turǵyndarmen qarym-qatynastary jaqsy ekenin jáne oqıǵanyń sebebi jóninde boljam jasaǵysy kelmeıtinin aıtty.

Budan buryn Shvetsııaǵa bıyl qysta elektr qýatynyń tapshylyǵy qaýip tóndirýi múmkin ekeni habarlandy.