Shvetsııada memlekettik jeńildikter toqtap, turǵyndardyń shyǵyny artýy múmkin
ASTANA. KAZINFORM — Shvetsııada úkimettiń qurylýy uzaqqa sozylǵandyqtan, janarmaı, qoǵamdyq kólik jáne elektr energııasyna qatysty ýaqytsha memlekettik qoldaý sharalaryn uzartý múmkin bolmaı otyr. Sonyń saldarynan turǵyndardyń kúndelikti shyǵyny artýy múmkin, dep habarlaıdy Kazinform agenttigi AZERTADJ-ǵa silteme jasap.
13 qyrkúıekte ótken parlament saılaýynan keıin Shvetsııada áli jańa úkimet jasaqtalǵan joq. Osyǵan baılanysty qazirgi ýaqytsha mınıstrler kabıneti 12 qarashada 2027 jylǵa arnalǵan ýaqytsha memlekettik bıýdjetti usynady. Onda jańa saıası bastamalar qarastyrylmaǵan.
Qarjy mınıstri Elızabet Svantessonnyń aıtýynsha, ýaqytsha bıýdjettiń negizgi maqsaty — memlekettiń turaqty jumysyn qamtamasyz etý. Bıýdjet qarajatynyń basym bóligi 2026 jylǵy deńgeıde qalady. Tek avtomatty túrde ındeksteletin jekelegen tólemderge ózgeris engiziledi.
Alaıda janarmaı salyǵyn tómendetý, avtobýspen júrýge jeńildetilgen abonementter berý jáne úı sharýashylyqtaryn elektr energııasy úshin joǵary tólemderden qorǵaý sharalaryn uzartý múmkin bolmaıdy. Osynyń saldarynan Shvetsııa turǵyndarynyń kúndelikti shyǵyny artýy yqtımal.
Solshyl-tsentrıstik partııalar parlamentte basymdyqqa ıe bolǵanyna qaramastan, ýaqytsha bıýdjetti qoldaýǵa kelisti. Olar 176 mandat ıelense, ońshyl blokta 173 mandat bar.
Jańa úkimet jasaqtalǵannan keıin partııalar bıýdjetke ózgerister engizip, ózderiniń ekonomıkalyq bastamalaryn júzege asyra alady.
Eske salaıyq, 17 qyrkúıekte Shvetsııa premer-mınıstri, Lıberal-konservatıvtik baısaldy partııanyń jetekshisi Ýlf Krıstersson saılaýda jeńilis tapqannan keıin otstavkaǵa ketken edi.