Shvetsııada maýsym aıynda ınflıatsııa 2,8%-ǵa jetti

ASTANA. KAZINFORM — Shvetsııada maýsym aıynda ınflıatsııa ósti — jıdekter men týrıstik paketter baǵasynyń kúrt qymbattaýy baıqaldy, dep habarlaıdy AZERTADJ.

Shvetsııanyń Statıstıkalyq basqarmasynyń (SCB) málimetinshe, eldegi ınflıatsııa maýsym aıynda KPI (Key performance indicators) ındeksi boıynsha 2,8% boldy. Bul kórsetkish mamyr aıyndaǵy (2,3%) deńgeıden de, Rıksbank qoıǵan 2,0 paıyzdyq mejeden de joǵary.

Inflıatsııanyń negizgi sebebi — týrıstik paketter men avtokólik jaldaý baǵasynyń ósýi, bul jaǵdaıdy ekonomıster maýsymdyq demalys kezeńindegi suranystyń artýymen baılanystyrady.

Azyq-túlik arasynda jańa jıdekter men pııaz baǵasy aıtarlyqtaı ósti — ótken aımen salystyrǵanda tıisinshe 16,9% jáne 16,7% qymbattaǵan. Kofe baǵasy 1% ósti, al azyq-túlik pen alkogolsiz sýsyndardyń jalpy baǵasy aıtarlyqtaı ózgermegenimen, bir jyl ishinde 5,3% kóterilgen.

Kerisinshe, elektr energııasynyń baǵasy 6,3% tómendedi.

Sarapshylardyń pikiri ártúrli. Swedbank jáne Nordea bankteri bul derekter ınflıatsııanyń turaqty ósýin bildirmeıdi dep esepteıdi, al Länsförsäkringar (Shvetsııanyń jyljymaıtyn múlik agenttigi) Rıksbank paıyzdyq mólsherlemeni tómendetýdi keıinge qaldyrady, óıtkeni baǵa turaqtylyǵynyń naqty rastalýyn kútedi dep boljaıdy.

— Bul jańa ınflıatsııalyq tolqynnyń bastaýy dep aıtýǵa negiz joq, — dedi Nordea bankiniń sarapshylary.

Buǵan deıin Shvetsııa burynǵy ofıtserleriniń áskerge shaqyrylý jasyn 47-den 70-ke deıin ulǵaıtatyny aıtyldy.