Shvetsııada kópbalaly otbasylarǵa tólenetin járdemaqylar qysqarady

ASTANA. KAZINFORM — Shvetsııada kópbalaly otbasylarǵa arnalǵan áleýmettik tólemderdi qysqartý josparlanyp otyr, dep habarlaıdy AZERTADJ.

Shvetsııa úkimeti áleýmettik járdemaqy júıesine aýqymdy reforma júrgizetinin jarııalady.

Agenttik habarlaǵandaı, bul bastamanyń negizgi maqsaty — mýnıtsıpalıtetter tarapynan beriletin áleýmettik tólemderdiń shekti mólsherin belgileý. Ózgerister ásirese kópbalaly otbasylarǵa áser etedi. Tórtinshi baladan bastap beriletin kómektiń kólemi azaıady.

Áleýmettik qamtamasyz etý mınıstri Anna Tene bul reformanyń maqsaty — járdemaqyǵa táýeldilikti azaıtý ekenin aıtty. Ásirese, jumys isteýge múmkindigi bola tura jyldar boıy memleket kómegimen ómir súrip jatqan mıgranttar arasynda. Mysal retinde ol bes balasy bar otbasyn keltirdi, qazir olar aı saıyn 46 500 shved krona (shamamen 4,2 myń AQSh dollary) alady. Jańa shekteýler engizilgennen keıin bul soma 38 300 kronaǵa (3,5 myń dollar) deıin qysqarady. Mınıstrdiń aıtýynsha, bul ata-analardy eńbek naryǵyna shyǵýǵa yntalandyrýy tıis.

Reforma úsh negizgi baǵyttan turady:

1. Áleýmettik tólemderdiń eń joǵary mólsherin shekteý;

2. Jumysqa ornalasqandarǵa arnalǵan arnaıy syıaqy engizý;

3. Mindetti túrde járdemaqy alýshylardy qoǵamdyq paıdaly jumystarǵa tartý.

Sonymen qatar, 2027 jyldyń 1 qańtarynan bastap elge jańadan kelgen mıgranttar áleýmettik kómekke tek bes jyl turǵylyqty ómir súrgennen keıin nemese bir jyl boıy aıyna keminde 20 000 krona (shamamen 1,8 myń dollar) jalaqy alyp jumys istegen jaǵdaıda ǵana úmitker bola alady. Bul shekteýler balalar járdemaqysy, turǵyn úı kómegi jáne basqa da tólemderge qatysty bolady, biraq áleýmettik járdemdi qamtymaıdy.

Úkimettiń esebinshe, bul ózgerister shamamen 145 000 úı sharýashylyǵyna áser etedi, onyń ishinde 30 000 otbasynyń járdemaqysy edáýir qysqarady. Reforma tolyqtaı 2028 jyly kúshine enedi.

Alaıda bul bastama oppozıtsııa tarapynan qatty synǵa ushyrady. Sotsıal-demokrattar úkimetti jumyssyzdyqpen kúresýdiń ornyna balalardy kedeılendirip, ata-analardy jumys isteýge májbúrleýdi kózdep otyr dep aıyptady. Olar qazirgi tańda Shvetsııadaǵy jumyssyzdyq deńgeıi 9%-ǵa jýyq ekenin jáne sońǵy bir jylda uzaqmerzimdi jumyssyzdar sany 42 myń adamǵa artqanyn eske saldy.

Solshyl partııa bul usynysty «qorqynyshty» dep atap, bılik jappaı jumyssyzdyqty elemeı, eń álsiz toptarǵa soqqy jasap otyr dedi. Jasyldar partııasynyń ókilderi bul sharany «járdemaqyny emes, kedeılikti reformalaý» dep baǵalap, ol álsiz otbasylardyń jaǵdaıyn odan saıyn qıyndatatynyn aıtty.

Budan buryn Shvetsııa jumys isteıtinder men otbasylarǵa iri salyqtyq jeńildikter engiziletini habarlandy.