Shvetsııada kedeılik deńgeıi ósip, áleýmettik qorǵaý júıesi álsirep barady
ASTANA.KAZINFORM — Shvetsııada sońǵy 4 jylda materıaldyq jáne áleýmettik turǵydan kedeılik jaǵdaıynda ómir súretin halyqtyń úlesi eki eseden astam ósti, dep habarlaıdy AZERTADJ.
Stadsmissionen qaıyrymdylyq uıymynyń baıandamasynda keltirilgen derekterge sáıkes, 2021-2025 jyldar aralyǵynda bul kórsetkish 3 paıyzdan 7 paıyzǵa deıin artqan.
Sonymen qatar elde halyqtyń qaryz júktemesi de kúrdeli máselege aınalyp otyr. Byltyr Shvetsııada shamamen 500 myń adam, ıaǵnı el turǵyndarynyń 5 paıyzy shamadan tys qaryzǵa batqan. Bul — sońǵy 20 jyldan astam ýaqyttaǵy eń joǵary kórsetkish.
Halyqtyń qarjylyq jaǵdaıy nasharlaǵan tusta shved zertteýshileri áleýmettik qorǵaý júıesindegi eleýli kemshilikterge nazar aýdardy. Olardyń pikirinshe, bul júıe halyqty kedeılikten qorǵaý jónindegi negizgi mindetin barǵan saıyn nashar oryndap keledi.
Áleýmettik saqtandyrý salasyndaǵy zańnamany zerttegen professorlar sońǵy jyldary azamattardyń áleýmettik kepildikteri aıtarlyqtaı álsiregen degen qorytyndyǵa kelgen. Zertteýshilerdiń aıtýynsha, bul ózgerister bılikte qandaı saıası kúshterdiń bolǵanyna qaramastan, birtindep júzege asqan.
Negizgi máselelerdiń biri — áleýmettik járdemaqy alý talaptarynyń qatańdaýy. Zańnamadaǵy talaptar men erejelerdiń kúrdelengeni sonshalyq, azamattar óz quqyqtaryn túsinip, járdemaqy alý úshin qajetti sharttardy oryndaýda jıi qıyndyqqa tap bolady.
Buǵan qosa, bıyl 1 shildeden bastap qate tólengen járdemaqyny alǵan azamattardan aqshany qaıtarý talap etilip qana qoımaı, olarǵa qosymsha aıyppul salynýy nemese bolashaqta járdemaqy alý quqyǵynan aıyrylýy múmkin. Mundaı sharalar ásirese qarjylyq jaǵdaıy osal azamattarǵa aýyr tıedi.
Bastapqyda halyqtyń ekonomıkalyq qaýipsizdigin qamtamasyz etý úshin qurylǵan áleýmettik saqtandyrý júıesinde birtindep basymdyq ózgerip keledi. Endi muqtaj jandarǵa qoldaý kórsetýden góri, járdemaqy alýshylardy baqylaýǵa kóbirek kóńil bóline bastaǵany atap ótiledi.
Buǵan deıin Argentınada kedeılik sheginde ómir súretinder sany kóbeıgenin habarlaǵan bolatynbyz.
