Shvetsııada Karl XII korolge tıesili buryn belgisiz bolǵan joryq kitaby tabyldy
ASTANA. KAZINFORM — Geteborg ýnıversıtetiniń kitaphanasynda kezdeısoq túrde Shvetsııa koroli Karl XII-ge tıesili buryn belgisiz joryq kitaby anyqtaldy, dep habarlaıdy AZERTADJ.
Zertteýshi Antoaneta Granber kitapty 1967 jyly kitaphanaǵa berilgen Hvıtfeld jınaǵyndaǵy arhıvtermen jumys istegen kezinde tapqan.
Agenttik Göteborgs-Posten basylymyna silteme jasap habarlaýynsha, kitap 268 betten turady, eski bylǵary qaptamada saqtalǵan jáne bul bylǵary qaptamanyń arqasynda altyn áriptermen jazylǵan jazýy bar. Onda 1707–1717 jyldar aralyǵyndaǵy kezeń qamtylǵan jáne biregeı egjeı-tegjeıli ıllıýstratsııalar — syzbalar, shemalar men áskerlerdiń qurylymdary kórsetilgen.
Kitap Poltavadaǵy shaıqas jáne Perevolochnadan keıingi kapıtýlıatsııa kezeńin, ıaǵnı shved dalalyq armııasynyń qyrylýyn qamtıdy, alaıda bul oqıǵalar jaıly kitapta eshteńe aıtylmaǵan kórinedi.
Zertteýshiniń aıtýynsha, kitap mazmuny Karl XII-ni sátsiz komandır retinde emes, tártip pen qurylymǵa degen mıftik deńgeıdegi umtylysy bar adam retinde beıneleıdi.
Keı taraýlarǵa koroldiń ózi qol qoıypty — «Carolus», al keıde tek «L.S.» dep kórsetilgen, bul Locco Sigilli, ıaǵnı «mórdiń ornyna» degendi bildiredi.
Basqa taraýlarǵa qol qoıǵandar qatarynda Karldyń jaqyn keńesshisi Karl Pıper jáne koroldik kantselıarııany basqarǵan baron ári áskerı Samýel Okerhelm bar.
Budan buryn Shvetsııada áleýmettik járdemaqylardy qysqartý qatty synǵa ushyraǵanyn jazǵanbyz.
