Shvetsııada ǵalymdardyń eskertýinen keıin mektepterge qaǵaz oqýlyqtar qaıta engizildi
ASTANA. KAZINFORM — Shvetsııada ǵalymdar planshet pen kompıýterdi shamadan tys paıdalaný balalardyń zeıinine, oqýyna keri áser etýi múmkin ekeni eskertilgennen keıin mektepterge qaǵaz oqýlyqtardy qaıta engize bastady, dep habarlaıdy Kyodo.
Shvetsııa mektepterge qaǵaz oqýlyqtardy qaıtara bastady. El bıligi bilim berýdi tsıfrlandyrýǵa qatysty burynǵy baǵytyn qaıta qarap, baspa oqý materıaldaryn satyp alýǵa bólinetin qarjyny arttyrdy.
Stokgolmdegi mektepterdiń birinde tórtinshi synyp oqýshylary qaǵaz kitaptardy oqyp, keıin mátinderdi daýystap aıta bastady. Qazir Shvetsııa mektepteri dástúrli oqytý tásilderine qaıta oralyp jatqandyqtan, mundaı sabaqtar jıilep keledi.
— Ekrannan oqyǵanda basym jıi aýyrady. Al qaǵaz kitaptardy oqyǵanda oǵan nazar aýdara alamyn, — deıdi oqýshy Emılııa.
Shvetsııa mektepterinde tsıfrlyq qurylǵylardy jappaı engizý shamamen 2010 jyly bastalǵan. Alaıda 2018-2022 jyldar aralyǵynda oqýshylardyń oqý saýattylyǵy men matematıka boıynsha kórsetkishteri aıtarlyqtaı tómendegen. Halyqaralyq PISA zertteýiniń nátıjeleri jarııalanǵannan keıin bul másele qoǵamda keń talqylana bastady.
Úkimet tapsyrysymen júrgizilgen, neırobıologtar men pedıatrlar qatysqan zertteý tsıfrlyq qurylǵylardy shamadan tys paıdalaný balalardyń zeıin qoıý qabiletin álsiretýi múmkin ekenin kórsetti. Sonymen qatar kóptegen jaǵdaıda qaǵaz oqýlyqtar men baspa materıaldary bilimdi jaqsy meńgerýge yqpal etedi.
Sonyń nátıjesinde 2023 jyly bılik bilim berý saıasatyn túzetti. Bastaýysh synyp oqýshylaryna qaıtadan qaǵaz oqýlyqtar men basqa da baspa materıaldaryn paıdalanyp oqytý usynyla bastady. Balabaqshalar men mektepterge arnalǵan mundaı materıaldardy satyp alýǵa memleket jyl saıyn 658-755 mıllıon shved kronasyn (shamamen 70-80 mıllıon dollar) bóledi.
Qaǵaz oqýlyqtarǵa qaıta oralý birqatar elderdegi keri úrdis aıasynda júzege asyp jatyr. Mysaly, Japonııada jaqynda tsıfrlyq oqýlyqtardy mektepterdegi negizgi oqý quraldarynyń biri retinde resmı bekitken zań qabyldandy.
— Bul sheshim mıy áli qalyptasý kezeńindegi kishkentaı balalardyń tsıfrlyq qurylǵylardyń áserine erekshe osal bolýy múmkin ekenin kórsetken zertteýlerge súıene otyryp qabyldandy, — dedi parlament bilim komıtetiniń tóraǵasy Ioar Forssell.
Sonymen birge sarapshylar oqýshylardyń úlgeriminiń tómendeýin tek tsıfrlyq tehnologııalardyń taralýymen baılanystyrýǵa bolmaıtynyn aıtady. Yqtımal sebepterdiń qatarynda demografııalyq ózgerister men mıgrant otbasylarynan shyqqan balalardyń bilim alý barysynda kezdesetin qıyndyqtary da bar.
2010 jyldardyń ortasynan beri Shvetsııa Sırııa, Aýǵanstan jáne Afrıkanyń birqatar elderinen kelgen bosqyndar men mıgranttardyń edáýir bóligin qabyldady. Bul da bilim berý júıesine áser etti.
Bandhagen mektebiniń dırektory Pıa Nıstrem barlyq máseleniń sebebin tehnologııalardan izdeý durys emes dep esepteıdi.
— Eń bastysy — tsıfrlyq jáne dástúrli oqytý ádisteriniń arasyndaǵy durys tepe-teńdikti tabý, — dep atap ótti ol.
Eske sala keteıik, Shvetsııada bosqyndar mártebesine qatysty jańa zań qabyldandy.
