Shvetsııada aýyr qylmys jasaǵan balalardy jazalaý máselesi talqylandy
ASTANA. KAZINFORM — Shvetsııanyń Gavle qalasynda 13 jasar bala kúdikke ilingen jappaı atystan keıin premer-mınıstr Ýlf Krıstersson bul oqıǵa kámeletke tolmaǵandar arasyndaǵy qylmysqa qarsy sharalardy kúsheıtý qajettigin kórsetedi dedi. Bul týraly AZERTADJ jazdy.
Úkimet aýyr qylmys úshin qylmystyq jaýaptylyq jasyn 15-ten 13 jasqa deıin tómendetýdi kózdep otyr. Bul qadam 26 aǵa prokýrordyń synyna ushyrady. Olar mundaı ózgeris quqyqtyq turaqsyzdyq týdyryp, ádilettilik qaǵıdattaryna nuqsan keltiretinin eskertti.
— Muny zań júıesine nuqsan keltirmeı júzege asyrý múmkin emes. 13 jáne 14 jastaǵy jasóspirimder arasynda damý men jetilý alshaqtyǵy tym úlken, — dedi prokýror Tobıas Kýdren.
Shvetsııa premer-mınıstri bul synǵa jaýap berdi. Ol óz sózinde ómir kúrdeli sheshimderge toly ekenin jáne uıymdasqan qylmyspen kúres neǵurlym jańa, sheshýshi ádisterdi qajet etetinin atap ótti.
Ádilet mınıstri Gýnnar Shtremmer 15 jasqa deıingi kámeletke tolmaǵandar qylmystyq jaýapkershilikke tartylmaıtyn qazirgi júıe aýyr qylmysqa osal dep qosty.
Sondaı-aq úkimet polıtsııa, keden jáne prokýratýraǵa zańsyz qarý men jarylǵysh zattardyń aınalymyna qarsy kúresti kúsheıtý týraly eki jańa tapsyrma berdi.
Bıliktiń málimetinshe, Shvetsııada bıyl kóktemde jarylǵysh zattardy tárkileý ótken jylmen salystyrǵanda úsh esege ósken. Úkimet bul qysymdy saqtap, qylmystyq jelilerge qarsy kúresti jalǵastyrýǵa nıetti ekenin aıtady.
Buǵan deıin Shvetsııa Estonııadan túrme oryndaryn jalǵa alatynyn jazǵan bolatynbyz.