Shvetsııada 145 myń pedagog qajet: balabaqsha tárbıeshileri jetispeıdi
ASTANA. KAZINFORM — Shvetsııada týý kórsetkishiniń tómendeýine jáne 2033 jylǵa deıin balalar sanynyń 200 myńǵa azaıýy boljanǵanyna qaramastan, balabaqsha tárbıeshilerine degen tapshylyq áli de ótkir kúıinde qalyp otyr, dep habarlaıdy AZERTADJ.
Shvetsııanyń Bilim berý máseleleri jónindegi ulttyq agenttiginiń (Skolverket) derekterine sáıkes, 2024 jyldan 2038 jylǵa deıin elge shamamen 145 myń jańa muǵalim men tárbıeshi qajet bolady. Bul kórsetkish pedagogıkalyq baǵyttar boıynsha oqý bitiretin túlekterdiń sanynan áldeqaıda joǵary.
Kadr tapshylyǵynyń negizgi sebepteri retinde pedagogıkalyq mamandyqtarǵa stýdentterdiń az túsýi jáne mamandardyń bul saladan kóptep ketýi kórsetilýde. Ásirese balabaqsha tárbıeshileri arasynda jumystan shyǵý kórsetkishi joǵary. Buǵan kúızelis, jumys júktemesiniń aýyrlyǵy, bala sanynyń kóptigi men bilikti áriptesterdiń jetispeýshiligi sebep bolyp otyr.
Mysal retinde Stokgolm qalasynyń Tensta aýdanyndaǵy Solbacken balabaqshasyn keltirýge bolady. Munda qyzmetkerlerdiń tek úshten biri ǵana pedagogıkalyq bilimi bar. Balabaqsha tárbıeshisi Haadel Amerdiń aıtýynsha, bul mamandyq tek balalarmen jumys isteı bilýdi ǵana emes, jospar qurýdy, komandaǵa jetekshilik etýdi, ata-analarmen tyǵyz qarym-qatynasta bolýdy talap etedi.
Shvetsııanyń Jergilikti jáne óńirlik basqarý organdary qaýymdastyǵynyń málimetinshe, kadrmen qamtamasyz etý kórsetkishi óńirler boıynsha árkelki: pedagogıkalyq baǵdarlamalary bar ýnıversıtetterdiń mańynda bul kórsetkish joǵary bolsa, aýyldyq aımaqtar men iri qalalarda, sonyń ishinde Stokgolmde – tómen. Sarapshylardyń pikirinshe, máseleni sheshý úshin tárbıeshilerdi dál kadr jetispeıtin óńirlerde daıarlaý qajet.
Budan buryn Shvetsııada jastar arasynda ishek qaterli isigine shaldyqqandar sany artyp kele jatqanyn jazǵanbyz.