Shvetsııada 13 jastan asqan balalarǵa elektrondy baqylaý engizýi múmkin
ASTANA. KAZINFORM — Shvetsııa úkimeti 13 jastan asqan jasóspirimderge, tipti olar qylmys jasamaǵan jaǵdaıda da elektrondyq baqylaý engizýdi usyndy, dep jazdy AZERTADJ.
Bul shara olardyń qylmystyq toptarǵa tartylýynyń aldyn alýǵa baǵyttalǵan jáne jeńildetilgen ádister taýsylǵannan keıin ǵana qoldanylady. Negizgi maqsat — áleýmettik qyzmetter belgilegen saǵattarda balanyń úıde bolýyn qamtamasyz etý.
Áleýmettik qyzmet isteri jónindegi mınıstr Kamılla Valtersson Grenvalldyń aıtýynsha, 100 bala baqylaýǵa alynýy múmkin. Baqylaý aqyldy saǵat sekildi qurylǵylardyń kómegimen júzege asyrylady dep josparlanǵan.
Sharany qoldaný týraly sheshimdi áleýmettik qyzmetterdiń ótinishi negizinde ákimshilik sot qabyldaıdy. Onyń oryndalýyn baqylaý Memlekettik mekemeler basqarmasyna júkteledi. Baqylaý merzimi 6 aıǵa deıin sozylýy múmkin.
Zań jobasy qazirdiń ózinde birqatar sarapshylyq uıymdardyń qatań synyna ushyrady. Olar bul bastamany qylmysqa kúdikti emes balalarǵa qatysty tym qatal dep esepteıdi.
Sonymen qatar, lıberaldardyń quqyqtyq saıasat jónindegi ókili Martın Melın kóp ata-analar qatań sharalardy qoldaıtynyn atap ótti.
— Ata-analar «kómektesińder, men balamdy qorǵaı almaımyn» deıdi. Biraq olardyń ótinishi talqylaýda sırek qarastyrylady, — dedi ol.
Zań jobasy zań keńesiniń qaraýyna jiberildi. Onyń qashan kúshine enetini ázirge belgisiz, sebebi qajetti tehnologııalardy satyp alý protsesi jalǵasyp jatyr.
Aıta keteıik, Shvetsııa azamattyq alý talaptaryn qatańdatty.
