Shvetsııa jumys isteıtinder men otbasylarǵa iri salyqtyq jeńildikter engizbek
ASTANA. KAZINFORM — Shvetsııa zeınetkerler men otbasylardy qoldaýǵa baǵyttalǵan sońǵy jyldardaǵy eń iri áleýmettik paketti tanystyrdy, dep jazdy Azartadj.
Shvetsııa úkimeti jumys isteıtin azamattar, zeınetkerler jáne balaly otbasylardy qoldaýǵa baǵyttalǵan iri bıýdjet ózgeristerin jarııalady.
AZERTADJ agenttiginiń habarlaýynsha, jalpy qoldaý paketi 30 mıllıard shved kronynan (shamamen 2,75 mıllıard AQSh dollary) asady.
Pakettiń negizgi bóligi — jumys isteıtin azamattarǵa arnalǵan jańa salyqtyq jeńildik, ol 21,4 mıllıard kronaǵa (shamamen 1,97 mıllıard dollar) baǵalanyp otyr. Úkimettiń esepteýinshe, mysaly, polıtseı men medbıke jumys isteıtin, eki balasy bar otbasy qosymsha 1 800 kronaǵa (shamamen 165 dollar) deıin aı saıynǵy tabys ala alady. Bul soma azyq-túlikke qosylǵan qun salyǵynyń tómendeýimen de baılanysty.
Budan bólek, baqsha (balabaqsha) men kúndizgi uzartylǵan toptarǵa tólemdi azaıtý úshin bıyl 1 mıllıard krona (shamamen 92 mıllıon dollar) jáne 2027 jyly 1,5 mıllıard krona (shamamen 138 mıllıon dollar) bólinbek. Bul arqyly qarapaıym otbasy jylyna shamamen 4 500 krona (415 dollar) únemdeı alady.
Sotsıal-demokrattar bul jeńildikterdi quptasa da, úkimettiń balalar járdemaqysyn arttyrýdan bas tartýyn qatty synǵa aldy.
— Bul úkimet óziniń burynǵy saıasatynyń saldaryn joıýǵa tyrysyp jatqandaı áser qaldyrady. Onyń ústine, bul qadam saılaýǵa bir jyl qalǵanda jasalyp otyr. Kóptegen otbasylar sońǵy úsh jyl boıy qıyndyq kórip keledi. Bul úkimettiń aqsha bólýdegi basymdyqtaryn bári biledi. Qazir Shvetsııa — ómir súrý qunynyń daǵdarysy kezinde balalar járdemaqysyn kóbeıtpegen Soltústik Eýropadaǵy jalǵyz el bolyp otyr, — dedi sotsıal-demokrattar partııasynyń ekonomıkalyq ókili Mıkael Damberg.
Sonymen qatar, úkimet zeınetaqy men áleýmettik tólemderge salynatyn salyqty tómendetý týraly sheshim qabyldady. Alaıda SPF zeınetkerler odaǵy bul qadamdy jetkiliksiz dep baǵalady. Uıym aıyna nebári 150 krona (14 dollar) kólemindegi paıda 25 000 krona kólemindegi zeınetaqy alatyndar úshin tym az ekenin málimdedi.
— Eldegi zeınetkerlerdiń 70 paıyzy 25 000 kronnan az zeınetaqy alady. Salyqtyń tómendeýi quptarlyq, biraq tómen zeınetaqy alatyndar úshin bul tek «tamshydaı kómek» ǵana, — delingen SPF tóraıymy Marııa Larssonnyń baspasóz málimdemesinde.
Sondaı-aq, elektr energııasyna salynatyn salyqty ár kılovatt-saǵat úshin 10 ere (shamamen 0,0092 dollar) mólsherinde azaıtý josparlanýda. Eger aılyq ortasha baǵa 1,5 kronadan (0,14 dollar) assa, óteý (kompensatsııa) mehanızmi engiziledi.
Eske sala keteıik, buǵan deıin Shvetsııa bıyl kúzde eń aýqymdy reformalar paketin usynatynyn jazǵan edik.