Shvetsııa jastary derbes ómirge daıyn emes

ASTANA. KAZINFORM – Kóptegen shved jastary ata-anasymen birge turyp, turmystyq shyǵyndy tólemeıdi. 

AZERTAC agenttiginiń habarlaýynsha, Pengakollen-niń jyl saıynǵy esebine sáıkes, 19-29 jas aralyǵyndaǵy jastardyń 53 paıyzy turǵyn úıge, azyq-túlikke jáne basqa da shyǵynǵa aqy tólemeıdi. Jeke qarjy salasyndaǵy sarapshylardyń pikirinshe, bul jaǵdaı jastardyń óz betinshe ómir súrý daǵdylarynyń qalyptasýyn qıyndatýy múmkin.

Esepteýlerge qaraǵanda, úıde turatyn 20 jastaǵy bir balanyń shyǵyny aıyna orta eseppen 7 320 shved krony (shamamen 659 AQSh dollary) bolady. Alaıda jastardyń tek 10 paıyzy ǵana turý úshin aıyna 3 000 kron (shamamen 310 dollar) nemese odan kóp tóleıdi, al 28 paıyzy bul somadan az tóleıdi. Mundaı jaǵdaıdyń negizgi sebepteri — ata-analardyń balalaryna aqsha únemdeýge kómektesýge umtylýy jáne qarjylyq saýattylyqtyń mańyzdylyǵy jónindegi túsiniktiń jetkiliksizdigi.

Jastardyń jartysy tolyq jumys istese de, ata-anasynan aqshalaı kómek alady. Kóp jaǵdaıda ata-analar uıaly baılanys, ınternet, strımıng qyzmetteri men azyq-túlik shyǵyndaryn tóleıdi. Sonymen qatar, saýalnamaǵa qatysqan jastardyń 36 paıyzy aldaǵy bes jyl ishinde óz baspanasyn satyp alatynyna senbeıtinin aıtqan.

Saýalnama nátıjeleri jastardyń ómirinde shopıngtiń mańyzdy oryn alatynyn da kórsetti. Respondentterdiń 61 paıyzy qyzyǵýshylyqtary men hobbılerine baılanysty taýar satyp alatynyn aıtsa, jastardyń jartysyna jýyǵy jeńildikter men satylymdardy belsendi paıdalanady. Ásirese qyzdar arasynda shopıngti jaǵymsyz emotsııalarmen kúresý ádisi retinde paıdalanatyndar kóp. Bul týraly saýalnamaǵa qatysqandardyń 19 paıyzy málimdedi.

«Qazir satyp al — keıin tóle» qyzmetteriniń, áleýmettik jeliler men ınflıýenserlerdiń tanymaldyǵy jastardyń satyp alý belsendiligin arttyryp otyr. Sarapshylar jastarǵa mundaı qosymshalardy joıýdy, ekran aldynda ótkizetin ýaqytty shekteýdi jáne «24 saǵat erejesin» ustanýdy usynady.